SARATOK: Program Sepenemu @ Komuniti beguna amat dikena meri penyedar ngagai mensia mayuh sentang pengerekai igi penyakit Covid-19.

Ketuai Penulung Direktor Unit Komunikasyen enggau Pemansang Mensia Mayuh,Opis Pemadah Sarawak,Ajes Tuah program tu mega ulih ngempit kaul mensia mayuh ejensi ke bekaul.

“Tuju program awakka rayat ba renggat baruh bela bulih penerang silik pasal penyakit Covid-19.

“Program tu dikemujur Opis Pengerai (KKM),Polis DiRaja Malaysia (PDRM),Gerempung Ukai Dikuasa Perintah (NGO) sereta ke bukai.

“Program baka tu chukup beguna nyangka bisi bedau bulih penerang ti engkeman ngelama tu,”ku Ajes rambau Program Sepenemu @ Komuniti ba Rumah Mang ditu apin lama ke udah.

“Arap mensia mayuh ulih nitihka lalau ejensi perintah bekaul ngambi igi penyakit tu mujur dipunas.

“Kemeratka pemeresi diri, anang reregap enti nadai kebuah, kena mih sengkabung mua lebuh nuju palan mayuh mensia.

“ Anang enda masu jari ngena sabun tauka penuchi jari. Aram bela nyaga pangan diri, jaga takah lalu meretika semua atur ti udah dipadah,”ku iya.

Ungkup penerang,program tu ditu keterubah diatur Opis Pemadah Pampang Saratok lalu bisi dua bengkah licha bekaul enggau Covid 19 dibantai Dr.Syafiq Ameerul Ibtisyam Zulkiflee (KKM) Pampang Saratok enggau Inspektor Mohd.Musa Ali ngarika PDRM.