KUCHING: Pemerani bejaku ba mua kamera bepun diterenak lebuh nyereta Pekit Kumang, pia ku Pemacha Berita Iban TV Sarawak (TVS) Jessica John Chung.

Pemacha berita TVS beumur 25 taun nya madahka diri nadai nyangka tauka baka ‘bidang terejun’ gawa ba stesyen televisyen laban iya nadai ngadang diri gawa ba stesyen tu.

“Sebedau tu, aku datai intebiu ba TVS minta pengawa ba Unit Orang Gawa laban aku belajar dalam bidang nya.

“Taja pia, lebuh diintebiu, aku mayuh diasuh bejaku baka nyadi pemacha berita enggau ke bukai,” ku iya lebuh dirandau ba Opis TVS.

Nambahka nya, iya madahka diri nampung pelajar ba Universiti Teknologi Mara (UiTM) Kampus Samarahan ba pelajar ‘Diploma Pengurusan Sains Pentadbiran, Ijazah Sarjana Muda Sains Pentadbiran enggau Sarjana Eksekutif Sains Pentadbiran dan Pengajian Polisi’.

Jessica John Chung

“Batang pengawa ba bidang TV nya pengawa ketiga aku ke alai sebedau tu aku kala gawa ba unit servis mensia mayuh di Telekom Malaysia ™ ti mantu aku nambahka penau enggau pemerani diri ayan ba TV.

“Pia mega, nyereta Pekit Kumang (Miss Unity Sarawak 2019 enggau Miss Valentine 2020) meri pengelebih ngambi aku berani bejaku ba mua bala mayuh,” terang Jessica.

Jessica madah, iya berasai rawan lebuh keterubah iya macha berita ba mua kamera laban nangika diri ngaga pengilap tang iya mesti mantaika pemerani diri engau ngembuan profesional.

“Lebuh nyadi pemacha berita, kitai mesti mantaika gaya mua baka enti berita dibacha nya sinu, kitai mesti mantaika asai sinu mega,” ku iya nerang pasal pangku pengawa diri.

Pemacha berita TVS penakan Iban, Bidayuh enggau China tu ngaku diri majak rinduka bidang tu.

Kelimpah ari nya, Jessica mega ngarapka iya ngerembaika penau diri dalam bidang macha berita tu.

Jessica John Chung