KUCHING: Penyiru Kepala Menteri Datuk Patinggi Abang Johari Tun Openg nyata dipeda pengudah iya ngemendarka pengawa numbuhka begunan Turu Main Asal Dayak (DCF) enggau Balai Dagang enggau Industri Dayak (DCCI).

Sapit Kepala Menteri ti mega Chairman DCF Datuk Amar Douglas Uggah Embas madah, tu kelai Abang Johari siku ketuai ti beratka peminta komuniti Dayak di menua tu.

Ku iya, pemanah enggau penyiru Kepala Menteri udah mai juluk ati komuniti Dayak ngelamatu nyadi nyata.

“Kepala Menteri udah magi tanah pemesai 2.32 hektar iya nya taba ti chukup strategik.
“Iya mega udah ngemendarka agih belanja penyampau RM20 juta dikena ngaga dua buah begunan tu ke alai kereja udah bepun,” ku iya.

Uggah bejaku munyi nya ba pengawa nasih tanah taba Begunan Indu Opis DCF enggau DCCI di Jalai Ong Tiang Swee ditu tadi.