ANANG mantul ngapa seagi enda tepantup ba bandir, nya mih jaku peransang siku pengelicha benama Margaret L Gregory ti mujur nembuka PhD dalam Doctor of Business Administration.

Ba penemu iya, pengidup sekumbang nampung pelajar ba renggat PhD ukai muntang belama tang sukung ari bala kaban nyadika peransang iya nembuka pelajar nya.

“Penguji enggau pemar endang bisi, kadang bisi asai deka mantul tang bai ati keran, aku mujur nembuka PhD tu lebuh ngingatka singkang pejalai ti udah diasaika aku ngelamatu.

“Pemar diasai lebuh nampung pelajar Master enggau PhD bebida amat ke alai lebuh nampung pelajar Master suba, aku bisi kaban ti ngembing enggau sama nembuka kus nya.

“Tang bebida amat enggau pelajar PhD tu laban kitai ngatika diri ngaga pansik nitihka kus diri.

RANSING… Gambar kenang Dr Margaret lebuh konvokesyen lebuh nerima Degree ari Universiti Oklahoma USA

“Aku sempama baka tekura enggai enda tepantup di bandir lebuh besekula laban enggai ngelebu diri empu ti udah bebendar ngulihka penemu,” ku Margaret nerang sentang pemar nampung pelajar PhD.

Ngelansa pasal singkang pejalai belelang ngiga penemu, anak pengkuan ari lima iku diri menyadi tu kala besekula ba sekula primari enggau sekula St Mary Kuching.

Sebedau tu, Dr Margaret madahka diri kala gawa ba kompeni bilun, hotel entarabansa enggau sektor kilang sebedau nyadi pengelicha ba sektor pelajar peribit.

“Diatu, aku udah ngentapka pengawa diri nyadi pengelicha ba UiTM Kota Samarahan kenyau ari taun 2010 pengudah 10 taun nyadi pengelicha ba sektor peribit,” terang iya.

Madahka penatai asal diri, niang apai iya ari menua Lempaong, Betong seraya niang indai ari Kemidan, Awik di Saratok lalu Dr Margaret ada enggau besai ba Kampung Tabuan Dayak, Kuching.

ENDA MANTUL NGAPA… Dr Margaret keran nampung pelajar ngagai tikas Phd pengudah bulih Master Degree.

PUH BELAJAR

“Lebuh gawa ba kompeni bilun, aku ngambi kemisi nadai begaji laban nampung pelajar ngagai University of Oklahoma at Oklahoma, USA enggau bulih Degree dalam Business Administration.

“Tujuh taun udah nya, aku bulih Master of Business Administration degree ba University Utara Malaysia (UUM) Kedah enggau Doctor Of Business Administration ari UiTM Malaysia.

Iya mega nampung pelajar Master Degree enggau PhD dalam bidang Business Administration lebuh gawa nyadi pengelicha.

Dr Margaret mega madah bisi bida lebuh nampung pelajar ba tikas Master enggau PhD.

Ambika banding ku iya, ari sukut ngaga pansik ke alai lebuh nampung pelajar PhD, kitai deka bejalaika pansik kediri.

“Taja aku ngaduka Master Degree tang aku agi ulih berandau, betanya ngagai bala pengelicha enggau bala bakih ke bukai,” ku iya nerang.

Nambahka nya, iya mega madahka diri napi pemar ditambah enggau kereja sereta nyadi siku indai.

Nya kebuah, Dr Margaret madahka diri mesti ngadu manah jam ngereja pengawa ba rumah enggau pansik iya.

NYADI PERANSANG… Dr Margaret (tengah) begambar kenang enggau Dr Malvern Abdullah enggau Professor Madya Dr Leong Siow.

ENDA MANTUL NGAPA

“Lebuh suah nulis enggau macha bup nembuka pansik nya, kadang kitai asai deka badu enggau putus pengarap.

“Tang, aku berasai chukup lantang ati laban ngembuan bakih ke suah meri jaku peransang enggau ngeringka semangat ngambi enda mantul ngapa.

“Bala bakih ti sama ngambi PhD tu meri jaku peransang dataika kami sebuat tembu magang bulih PhD,” ku iya tuchum manis ngenang pemar nampung pelajar PhD.

“Sida ngasuh aku berundingka diri enda kediri nujah semua pemar enggau penguji ngerandang singkang pejalai nembuka pelajar PhD tu,” ku Dr Margaret seraya meri terima kasih ngagai bala bakih ti seruran begulai bejalaika pansik.

“Taja mayuh pemar diasaika aku sebedau tu, tang tu mih pejalai pengidup aku nampung pelajar ke meri seribu kenang manis enggau mujur bulih PhD,” ku iya seraya tuchum manis.

Iya mega madahka diri lantang ati laban ngaga pemutus ngulu latih begulai enggau Serakup Pemansik Sarawak (SRS) nentuka iya nemu pekara baru lebuh ngaga pansik.

Dr Margaret mega madahka diri ukai ti pintar ba sekula tang iya majakka singkang diri baka orang bukai dataika iya nempa pemujur baka ke diatu.

Nya kebuah, singkang pejalai Dr Margaret tu patut nyadi chunto ngagai rebak biak ngambi enda mudah putus pengarap dataika mujur jemah.

JAKU PERANSANG

Dr Margaret ngelalau nembiak anang kakang ati lebuh ngaga pemutus diri empu laban kuing pengidup dudi hari bepanggai ba kitai empu.

“Pajak ke aja juluk kita enti deka nampung pelajar laban nya endang juluk ke patut nentuka pengidup ke menyana dudi hari,” ku Dr Margaret meri lalau.

“Bala nembiak patut ngembuan runding pemar nya tau ngasuh sida kering enggau nyingkang ke mua ngubah pengidup sida jemah.

“Taja ukai muntang nampung pelajar, tang kitai deka ngasaika penguntung baka bulih kereja menyana, bepangkat tinggi enggau begaji besai.

“Kelimpah ari nya, kitai mega ulih nambahka penau enggau peneleba diri, ngerembaika kaul enggau bala bukai,” ku iya nyimpul randau begulai enggau Suara Sarawak.