SIBU: Sarawak diaku mujur nagang pengerekai Covid-19 nyentuk diatu asil penumbuh Komiti Penyangga Penusah Ngenyit Nengeri (JPBN) ti neritka atur nentuka adan menua Sarawak seruran dijaga.

Kepala Menteri Datuk Patinggi Abang Johari Tun Openg madah, nengah JPBN betuaika Datuk Amar Douglas Uggah Embas chakah nentuka pengawa nagang tama ke Sarawak diterit nyengkaum kuarantin pengelama 14 hari.

“Sarawak ngembuan autonomi ngaul kuasa imigresyen mantu nagang penyakit berampit di baruh kuasa konstitusyen nentuka Sarawak seruran likun,” ku iya nerang.

Abang Johari mansutka jaku nya lebuh bejadika Begunan Baru Serakup Gempung China Bagi Menua Sibu (UCA SIBU), seharitu.

Iya mega ngaku pengawa dagang nya ba Sarawak bisi kusut kelebih agi lebuh kitai ngemeran char baru diatu.

“Tu mai reti, semua digaga kitai udah tu deka berubah lalu kitai enda nemu kemaya igi penyakit tu punas.

“Nya kebuah Perintah Sarawak nyendiaka bemacham bantu khas laban mayuh rayat napi penusah.

“Entara bantu disediaka perintah iya nya Bantu Khas Sarawakku Sayau (BKSS), bantu belanja bukai nyengkaum insentif ungkup pedagang,” ku iya.

Berebak enggau nya, Abang Johari berasai lantang ati laban Sarawak jauh bebida ari Semenanjung Malaysia enggau Sabah kelebih agi ari sukut pekara politik diatu.

Kebuah pia ku iya, ba timpuh diatu sida agi berebut kuasa nyadi Menteri Besai enggau mayuh agi penanggul politik bukai taja sida diatu patut ngemeratka pengelantang rayat baka dikereja Perintah Sarawak diatu.