SARATOK: Peranak rumah panjai Nanga Gong, Ulu Senulau ditu begau laban nyau deka bebadi dituntung penusah karam di darat kena pagi Hari Dua tu tadi.

Tuai Rumah Jangan Upal madah, sida serumah kesal ati lebuh tepedaka sebun tebal datai ari ujung bilik pintu lumur 12 ba penusah ke nyadi urung pukul 10 pagi nya.

Ku iya, nasip endar sida sikar enggau nemu chara ngena kereban pengerara api ti bisi disedia ungkup pengelikun dia laban kala ngulu program diatur raban Bomba begulai enggau komuniti.

“Kami benasip amat laban bisi nerima kereban pengerara ari Palan Servis Komuniti Sitak Parlimen Saratok dalam bulan June taun tu tadi.

“Enti nadai kereban nya enggau penyikar bala kami serumah mutarka penusah, tentu rumah panjai kami diatu udah nyadi abu, tinggal tuga aja,” ku iya lebuh dirandau Suara Sarawak tadi.

NGASUH KESAL ATI… Gaya ramu ba dapur ke nyau deka angus diempa api.

Ari nya, iya ngarika sida sebala meri besai terima kasih ngagai bala staf ba palan servis kelebih agi pengari rayat sitak nya, Ali Biju ti seruran beratika pekara pengelikun enggau pengelantang rayat.

Berebak enggau nya, Sapit Menteri Pengeluar Kuasa enggau Pengeraja Asal ti mega Kaban Parlimen Saratok, Ali Biju meri tabi puji ke penyikar peranak Rumah Jangan lebuh mutarka penusah ngenyit baka nya.

“Aku chukup lantang ati meda Tuai Rumah Jangan enggau rayat iya ngena manah penemu dipelajar sida lebuh bekenaka kereban pengerara api tu.

“Ukai minta enggau nyampika utai enda manah nyadi tang kitai udah meda sida tu sikar sereta lanchat ngereja pengawa lebuh napi penusah ngenyit.

“Nya kebuah aku nyukung penuh program ungkup pengelikun ba rumah panjai baka ti suah dipejalai raban Bomba ngelama tu. Aku ngarapka penusah baka tu ulih diseliah.

“Kebendar, kereban pengerara api tu diberi ke penabat kitai maya napi sebarang penusah jemah,” ku Ali nyimpul jaku iya.

PENYAH PENUSAH… Tuai Rumah Jangan mulaika tiga kereban pengerara api ke udah dikena ngagai palan servis komuniti ngambika diganti enggau iya ke baru.