SIBU: Juluk Perintah Sarawak nirika lima buah sekula entarabansa ba menua tu ukai ngelanggar undang-undang pelajar menua.

Kepala Menteri Datuk Patinggi Abang Johari Tun Openg dekaka nembiak Sarawak ngiga penemu datai ba tikas pemadu tinggi lalu ulih besemekih enggau orang bukai.

“Nya kebuah kitai nirika lima buah sekula entarabansa taja bisi sekeda piak ngumbai pengawa nya ngelanggar undang-undang pelajar menua.

“Nya kebuah dalam Ripot Komiti Entara Perintah (IGC) udah madahka sistem pelajar deka dipejalai bala selama kelimpah Dun ngubah iya lalu deka ditampung lalu Dun empu deka ngaga pemutus nya,” terang iya.

Abang Johari mansutka jaku nya lebuh bejadika Librari Nengeri Sarawak Sibu, ditu kemari.

Iya madah, tu mai reti Sarawak ukai ngelanggar undang-undang pelajar menua laban sekula entarabansa nya dipejalai di baruh Yayasan Sarawak.

“Sekula entarabansa tu deka ngena silibus Cambridge ke alai bala nembiak deka besemekih enggau bala bukai ti sama pemintar.

“Nya alai, kami nirika sekula tu ngambi bala nembiak datai ari ruang bilik ti tusah ulih besekula enggau bayar ke jauh murah tauka pechuma lebih agi bala nembiak ari menua pesisir,” terang iya.

Nambahka nya, Abang Johari madah nembiak ari sekula entarabansa deka nyadi jaguh dunya kelimpah ulih nyadi modal mensia ba Sarawak.

Iya mega ngarapka Librari Sibu ti dilanchar kemari ngambi nerenak ulah angkun macha enggau nambahka penemu dudi hari.

Librari Sibu diatu nyadi Kampus Zon Tengah Pustaka Negeri Sarawak enggau digaga ba tanah pemesai 7,300 meter persegi enggau ulih ngundan 500 penguna.