SIBU: Penatai pemisi dikembuan kitai (sarawak) mesti diatur manah ungkup pemansang infrastruktur, ku Kepala Menteri Datuk Patinggi Abang Johari Tun Openg ti dekaka Sarawak nyadi menua maju manggai taun 2030.

Ku iya, Bagi Menua Sibu deka dikemansang enggau bemacham projek infrastruktur kelebih agi jalai alun, jematan nyengkaum bekal ai enggau kuasa karan ngagai kandang menua pesisir.

“Kebuah pia laban kitai deka rayat menua pesisir randakka pemansang infrastruktur tu.

“Nya kebuah, pemansut tu mesti dikemansang ngambi ulih nyikap infrastruktur ekonomi kelebih agi ba menua pesisir,” ku iya.

Abang Johari mansutka jaku nya ba Pengerami Makai Lemai Begulai Enggau Ketuai Komuniti ba sebuah hotel tebilang di Sibu, Hari Tiga tu tadi.

Pemansang betanam betupi ba Machan diatu deka dikemansang lalu iya empu udah ngabas palan nya.

“Kitai meda Sarawak tu chukup besai lalu kitai dekaka pemansang majak ditambah taja suba kitai mayuh bepanggai ba Perintah Besai tang pekara nya nadai meri empas besai.

“Nya kebuah, aku ngambi pemutus kitai empu mutarka pekara tu ke alai Perintah Sarawak nyendiaka agih belanja lebih RM4 bilion ungkup pemansang ngaul bekal ai enggau ke bukai.

“Lebuh nyadi pengari rayat kita, kami seruran ngabas rayat ba selampur Sarawak enggau chakah mai pemansang infrastruktur ngagai rayat,” terang iya.

Bekaul Tanah Adat Bansa Asal (NCR), Abang Johari madahka Perintah Sarawak deka nampung pengawa nyukat tanah enggau mantu meri gazet ngagai tanah beungkus lebih RM40 juta ungkup rayat baka dipasuk ba undang-undang tanah.

“Perintah Pakatan Harapan (PH) suba ukai baka kami, sida nadai meri pampas tauka meri gazet ngagai tanah tang sida narit pulai pengawa nyukat tanah NCR tu.

“Nambahka nya, bisi orang nempa jaku madahka Perintah Sarawak ngerampas tanah rayat taja nya semua nya semina jaku bula aja.

“Kami meri gazet ngagai tanah, pampas enggau pala tanah ngambika rayat ulih nguna tanah nya ungkup sektor betanam betupi,” ku iya.