KANOWIT: Produk pemakai ari asil produk betanam betupi Sarawak bisi pengulih besai ba makit eksport.

Kepala Menteri Datuk Patinggi Abang Johari Tun Openg madah, Sarawak mesti ngubah industri betanam betupi ngagai chara ke moden agi awak ulih mansutka mayuh asil.

“Beduduk ari pekara tu, Perintah Sarawak ngagihka belanja RM750 juta ungkup sektor betanam betupi taun tu.

“Nya mih agih belanja pemadu besai diungkupka pengawa betanam betupi di Sarawak,” ku iya.

Abang Johari mansutka jaku nya lebuh bejadika Opis Betanam Betupi Nanga Machan ditu, lemai kemari.

Sama datai Sapit Kepala Menteri Datuk Amar Douglas Uggah Embas, Menteri Dagang Dalam Menua enggau Pekara Penguna Dato Sri Alexander Nanta Linggi,Sapit Menteri PengeraiDatuk Aaron Ago Dagang, Menteri Muda Pelajar, Sains enggau Pansik Teknologi Dr Annuar Rapaee, Sapit Sekretari Perintah Nengeri Dato Sri Mohamad Abu Bakar Marzuki enggau Adun Machan Allan Siden Gramong.

Opis Betanam Betupi Macham beungkus RM4 juta nya di baruh Langgur Pemansang Malaysia Lumpar Ke-11 (RMK11) ti udah tembu ujung taun nyin kemari.

Ku Abang Johari, makin mayuh produk pemakai ari menua tu diatu dieksport ngagai Singapore.

“Kami udah eksport ikan tilapia enggau ikan patin ari Batang Ai enggau babi idup ngagai Singapore.

“Minggu nyin kemari, kitai mega udah nyual kemiding ngagai menua nya.

“Singapore ukai semina makit endur kitai ngelakuka produk menua tang pengeksport kitai mesti ngena manah peluang tu.

“Diatu, kitai bisi Opis Dagang Temuai Sarawak Singapore (Statos) din nentuka produk kitai rembus ngagai makit din,” ku Abang Johari.

Berebak enggau nya, Abang Johari meransang bala pekebun enggau sida ke diau semak Padang Bilun Sibu berengkah nanam kemiding ba tanah sida.

Iya mega madahka perintah deka nyendiaka mayuh agi jalai alun ngambi ngerandang mayuh agi kandang menua endur pengawa betanam betupi ba menua ulu.

“Pekebun ulih ngelakuka produk sida enti perintah nyendiaka jalai alun ba menua tu.

“Temuai ulih ngelawa enggau meli produk sida kelimpah pekara tu deka nambahka pemayuh temuai kitu,” ku iya.

Iya mega madahka Sarawak nagit semua kandang menua pesisir deka nerima bekal ai enggau kuasa karan nengah Skim Kuasa Karan Menua Pesisir Sarawak (Sares) enggau Bekal Ai Altenatif Sarawak (Sawas) manggai taun 2025.

Ba pengawa nya, Abang Johari udah ngagihka belanja RM2 juta dikena nambahka program enggau aktiviti pemansang betanam betupi ba Machan.

Iya mega ngagihka belanja RM3 juta ungkup Projek Waterfront Machan.

Kepala Menteri mega besetujuka peminta Allan nyikap jalai alun ngagai Ulu Machan.

“Jalai nya deka digaga jematan dulu meraka Sungai Machan lalu benung digaga diatu,” terang iya.

Ngelansa pasal pekara politik, Abang Johari ngelalau rayat Sarawak ngenegap kaul penyerakup di menua tu.

“Sintal kaul rayat tu beguna amat nentuka menua kitai meruan tegap.

“Semangat tu besai reti ngambi kitai besaup nagang pengerekai Covid-19 ke alai kes Covid-19 ba menua tu majak kurang iya nya siti lumur aja,” ku iya nyemetak madah.