SIBU: Kepala Menteri Datuk Patinggi Abang Johari Tun Openg ngelalau semua ketuai komuniti ba selampur Sarawak terus nyukung pemansang Sarawak nitihka chuan kediri empu baka ditan ari suba.

Ku iya, Sarawak udah mantah perambu MPKK (Komiti Pengatur Komuniti Genturung Pendiau) laban Sarawak ngembuan chara kediri empu ngatur menua nentuka pengelantang pupu bansa dijaga lebuh Perintah Pakatan Harapan (PH) suba.

“Nengeri bukai nadai Temenggung, Sarawak aja bisi Temenggung ari suba nyengkaum Pemancha, Penghulu, Tuai Rumah disambung ba jeman kolonial mengkang ditan dataika Sarawak merdeka enggau dataika seharitu.

“Nya mih sistem dikena Perintah Sarawak enggau ketuai dalam komuniti laban ketuai nya orang dipebasa komuniti.

“Sida mega nyadi pengari perintah lebuh ngelalau enggau nyebar polisi perintah,” ku iya.

Abang Johari mansutka jaku nya ba Pengerami Makai Lemai Begulai enggau Ketuai Komuniti ba sebuah hotel tebilang, Hari Tiga tu tadi.

Iya mega madah, pengawa nasih tanah Begunan Unifor apin lama ungkup pengarap bukai beungkus lebih RM70 juta nentuka kitai ngembuan kaul ke manah enggau pangan diri.

“Ba Belaga, kitai udah bejadika pengawa nasih tanah Mesejit Pelilih Belaga beungkus RM10 juta ti dipinta pengari ukai pengarap Islam ti dekaka mesejit nya didiri ungkup rayat Islam dia.

“Sama mega enggau Datuk Amar Awang Tengah Ali Hasan ti udah ngemendar pengawa nirika gerija enggau kuil ba Lawas.

“Nya mih penyelai ke mesti ditan enggau manah enggau Perintah Sarawak deka ngemansangka Sarawak nitihka chuan sereta adat asal kitai empu,” ku Abang Johari nerang.

Sekumbang timpuh pengerekai Covid-19, Abang Johari madahka Perintah Sarawak enda ibuhka pekara ke nyadi bekaul berebut kuasa dalam politik Malaysia baka ke nyadi ba Semenanjung Malaysia enggau Sabah.

Nambahka nya, iya madahka diri deka mantaika pelin dua minggu agi bekaul inisiatif Sarawak nyerungkai minyak enggau gis ba menua tu.

Ba pengawa nya, lebih ari 242 iku ketuai komuniti ari Zon Tengah mungkur Sibu, Mukah enggau Kanowit udah diberi setipikit dichiri nentuka sida ulih bejalaika pangku pengawa enggau manah.