LONG LOYANG: Penyakal chukup mayuh strategi ngambika peranak menua pesisir ba Telang Usan milih sida maya Pengawa Bepilih Nengeri (PRN) ke deka diatur sebarang maya.

ku Sapit Kepala Menteri Datuk Amar Douglas Uggah nerang seraya ngelalau rayat kelebih agi ari menua pesisir anang mudah pechayaka jaku raban penyakal.

“Penyakal tu deka nabur bemacham danji enggau jaku manis ngagai bala pengundi baka ke udah dikereja sida ngelamatu.

“Nya kebuah, rayat mesti belajar ari pekara ke udah nyadi ke alai sida udah nyukung siku Kaban Parlimen enggau siku Adun ari penyakal,” ku Uggah nyemetak madah.

Uggah mansutka jaku nya ba Pengawa Nutup Program Betanam Betupi Ngaul Komuniti (AgriCOP) ba Balai Raya Kampung Long Loyang, ditu kemari.

Uggah madahka penyakal semina deka mantaika pekara ti nadai nguntungka rayat.

“Sida puntan ngamatka semaya diri lebuh suba sida udah ngeruga runding rayat.

Tang diatu, rayat enda arapka jaku sida pengudah penyakal nadai ulih ngamatka semaya diri.

“Pengari rayat kita, Dennis Ngau dibaruh Perintah GPS udah mai mayuh pemansang ungkup rayat.

“Iya agi biak, regas enggau ngembuan mayuh buah penemu nentuka rayat ditu ngasaika mayuh pemansang.

“Dennis mega siku pengari rayat ti berani mantaika penanggul ke nyadi ba Telang Usan maya Aum Kunsil Nengeri (Dun).

“Iya mega keran nyaga pengelantang rayat dalam Perintah GPS baka mendingka sebana rayat, negika hak enggau pengeraja menua,” ku Uggah nyemetak madah.

Berebak enggau nya, Uggah madah, Dennis deka gawa bebendar pengudah pengawa bepilih ke deka datai ungkup pemaik rayat ditu.

“Nya alai, aku ngelalau semua rayat seruran nyukung iya ngambi mantaika sada kita ngagai Perintah GPS.

“Tejuka iya enggau pengari rayat GPS menang besai maya PRN ila,” tandu Uggah.