Dalam pengidup kitai besehari-sehari dia kitai suah betemu enggau mayuh orang, sekalika sida nya bepangkat tauka enda, tuai tauka biak, kaban belayan tauka orang bukai baru enggau bekelala.

Bemacham chara jaku kangau basa dikena kitai nela pangan diri nitihka penyiru peneleba tauka adat basa kitai enggau orang nya kelimpah ari nyebut nama amat sida.Bisi nya dikangau kitai bos, tuan, madi, kaban, bakih, unggal, uchak, sulu, sayau enggau ke bukai.

Tang nitihka penemu raban orang ti landik pasal komunikasyen di Amerika, kitai mensia kebendar lebih rindu agi ninga nama diri disebut datai ari mulut orang bukai. Ambika chunto, enti nama orang ‘Hamelton Bala,’ dia iya deka rindu agi orang bukai ngangau nama iya “Bala” aja ari ti ngangauka nama iya “Tuan Hamelton”.

Baka nya mih chara ke diguna orang ba menua luar, tang ba kitai bansa. Kebendar kitai bisi adat kediri ti bebida enggau orang barat lebih agi enti kitai orang ke tulen asal datai ari rumah panjai. Dia ari mit, apai indai udah ngajar bakani ngangau orang tuai.

Ba menua kami tungga ke Engkilili, Sri Aman. Enti orang nya menyadi apai indai, sida patut dikangau kitai apai yak (biak), indai yak enti iya biak ari apai tauka indai. Nyema sida nya menyadi tuai apai tauka indai, kitai diajar patut ngangau orang nya apai tuai tauka indai tuai.

Udah nya, orang ti ngadaka apai indai kitai patut dikangau aki tauka ini nyengkaum kitai serumah ke bela serambau tauka tuai agi ari aki ini kitai semua sida nya patut dikangau aki tauka ini magang.

Tu mih chara basa tauka adat kitai Iban chara ngangauka kaban belayan ke dampih. Tambah mega, enti ba rumah panjai enti suba tak jarang orang bukai. Semua sida nya endang purih pantis pangkat aki ini, petunggal apai tauka indai kitai magang.

Taja pia di mengeri pasar besai mayuh adat asal ke baka tu nyau begembar enggau pangka dunya moden. Kekadang kaban belayan ke semak ditela enggau kangau ‘auntie tauka uncle’. Enti diperati amat enggau adat asal bansa kitai leka jaku kangau tu kebendar udah jauh amat nunjukka pengerenggang ari segi kaul laban nya sebaka pangkat enggau orang bukai ke nadai sebarang kaul enggau kitai.

Kedua nyangka rindu dikangau enggau tela nya . Tang enti diperati amat ari sukut tusun adat basa dia pekara ke baka tu kebendar ulih ngelenyauka identiti asal kitai bansa laban ti terunda-runda enggau pendiau rama kemaya hari.

Orang tuai mega lebuh sida ngangauka kitai ke biak, dia sida chukup bejimat milih leka jaku ke dikena nela kitai. Ambika chunto, apin lama penulis terubah iya nerima kangau telefon ari pengajar Jantan Umbat bekaul enggau leka jaku ti nyengkalan diguna ba karang pemberita. Taja penulis suah ninga sada nyawa pengajar tu dalam program diatur Waifm Iban sebedau tu tang apin kala berandau tauka betemu mua.

Nyadi maya keterubah bekelala tu tadi, dia pengajar tu dulu nanya ni maya umur penulis. Tu ngelai pengajar tu chukup bejimat enggau deka nemu ni bagi leka jaku kangau ke engkeman dikena ngangauka penulis sebedau ngepunka randau.

Lebuh penulis madahka umur diri baru manggai 33 taun, nyadi iya minta pemendar baru ulih aku ngangauka nuan ‘Jang,’ku iya. Nyadi saut aku, au pengajar nadai nya salah, ku aku.

Nyadi bakanya mih chara basa kitai bansa lebih keterubah bekelala enggau orang. Orang ti beradat sereta bepenemu sida enda sengapa rembang awakka ulah pendiau nya nyadi perati lalu terus nyadi chuan teladan kitai ke nembiak.

Sekeda leka jaku ke ulih dikena nela orang ke biak baik nya indu tauka lelaki ba bansa kitai iya nya sida tau dikangauka Jang, Igat, Wat, Endu, Endun, Umang, Mau enggau Mit. Kekadang bisi mega sida tuai ke lebih siru nganggauka kitai ‘anak’ taja pan sida nya ukai orang ti ngadaka kitai tang nya kebendar ketegal basa tauka tanda penyiru iya ngasaika orang nya nyau baka anak diri empu.

Nya alai arapka semua kitai terus ngetanka identiti adat diri nguna jaku kangau basa ke nyengkalan nuju semua orang. Seliahka jaku kasar sereta enda menuku laban nya tau ngasuh ati bakih kitai telih tauka ensiban. Belajar mih nguna jaku siru awakka bansa kitai terus pegari nyadi bansa ke dikelala enggau adat ti mentas sereta siru.