KUCHING: Loji hidrogen deka digaga ba Bintulu nyadi chara tumu nentuka pansik teknokomersial dalam ngerembaika pengeluar hidrogen di menua tu.

Chairman Opis Pemansang Ekonomi Sarawak (SEDC) Tan Sri Abdul Aziz Husain madahka pengawa nya ngasuh pemain industri bekunsi pemanah ti sama kelebih agi pemansang hidrogen dunya.

“Kerejasama tu ulih mantu ngemuntangka pemansang enggau nentuka juluk dagang bejalai manah kelimpah endur SEDC maju ngagai tikas ti lebih tinggi,” ku iya.

Iya bejaku munyi nya ba Program Nyain Sempekat Pemereti Ati (MoU) entara Opis Pemansang Ekonomi Sarawak (SEDC) begulai enggau Sumitomo Corporation sereta Eneos ti deka numbuhka Loji Hidrogen di Bintulu ba sebuah hotel ditu, kemari.

Tandu iya, pengawa nya beguna dalam nentuka tuju pengerembai enggau pemansang loji hidrogen di Taman Kimia, Bintulu.

“Kerejasama tu ulih ngasilka pengawa beranakka puku ti manah ungkup Sarawak nyengkaum Malaysia laban ulih muka pengawa puang ngagai rayat,” ku iya.

Berebak enggau nya, Pemesai Eksekutif, Menijar Besai enggau Begian Kuasa Sumito Corporation Hajime Mori madahka Perintah Sarawak udah meri sukung tegap ngagai Loji Hidrogen ba projek Sarawak enggau Jipun.

“Lebuh dunya napi penanggul menua ti angat, aku pechaya aktiviti dagang ngena hidrogen deka ditegapka penuh ba taun 2050.

“Tu laban guna hidrogen ba Jipun entara sumber ungkup nyapai pemanah rampa menua,” ku iya.

Nangkan nya, Mandal Presiden Kanan, Pemesai Eksekutif Enoes Miyata Tomohide madahka bala sida nyambut manah MoU ti digaga nya.

Pengawa nyain sempekat nya diatur nengah zoom seraya dikemataka Kepala Menteri Datuk Patinggi Abang Johari Openg.

MoU nya disain Abdul Aziz ari SEDC, Hajime Mori ari Sumito Corporation enggau Miyata Tomohide ari Enoes.