KUCHING: Perintah Gempung Parti Sarawak (GPS) enda gila kuasa ngatur Pengawa Bepilih Nengeri Ke-12 (PRN-12) maya pandemik Covid-19 mangka menua tang pekara ke beguna iya nya bulih mandat ari rayat ngatur Sarawak sekumbang timpuh Dun ke deka abis kena April 2021.

Kepala Menteri Datuk Patinggi Abang Johari Tun Openg madah, endur ngatur PRN-12, Perintah GPS deka berundingka penemu orang ke landik lebih agi ari Opis Pengerai Malaysia (KKM) pasal penyadi pandemik Covid-19.

“Kitai benung berundingka kededua pekara iya nya Covid-19 enggau mandat ari rayat.

“Nyema nadai mandat, tusah ga laban nadai perintah ngatur nengeri lalu nya kebuah, kitai begunaka mandat ari rayat,” ku iya maya aum pemberita BKSS 4.0 ditu kemari.

Tandu Abang Johari, mandat ari rayat ngatur Sarawak beguna ukai semina dikena mutar penyadi Covid-19 tang mega pasal ekonomi.

“Kitai nangi pasal pengerai mensia mayuh yang berebak enggau nya, kitai enda ulih mutarka Covid-19 enti nadai mandat.

“Jam diatu aku bisi mandat lalu aku ulih ngaga pemutus tang nyema nadai mandat, aku enda ulih ngaga sebarang pemutus,” ku iya.

Tandu iya, tu pekara ke tusah tang Perintah GPS deka berundingka genap pekara sebedau ngaga pemutus.

Taja pia, ku iya Sarawak patut ngatur PRN-12 tang pekara ke nyadi tanda tanya sekalika ngatur pengawa bepilih tauka enda nya tepulai ngagai pemutus Komiti Pengawa Bepilih Besai (SPR).

“Nyema pengawa bepilih diatur, kitai nyerahka ngagai SPR nentuka SOP lalu aku enggai meda penyadi di Sabah nyadi ba Sarawak laban nya dua pekara ke bebida.

“Kebuah pia laban pengerai mensia mayuh patut dikemerat jam diatu,” ku iya.

Abang Johari ke mega Chairman GPS madah, New Zealand, Singapore, Korea Selatan enggau Myanmar benung ngatur pengawa bepilih besai taja betapi enggau Covid-19.

“Nya alai, mandat kitai abis timpuh April 2021 tang iya ulih padam kediri dalam timpuh 120 hari kena Jun,” ku iya.