KANOWIT: Sektor betanam betupi Sarawak bisi pengulih besai laban menua tu ngembuan mayuh pengelebih kelimpah produk kitai nerima peminta tinggi ari makit luar.

Kepala Menteri Datuk Patinggi Abang Johari Tun Abang Openg madah, kelimpah ngembuan tanah ti ami enggau menua ti lindap, Sarawak mega dipegai perintah ti keran nyungkak sektor nya.

Pia mega ku iya, perintah ngagihka besai belanja ngambi nyungkak sektor betanam betupi mungkur semua pekara.
“Naka tu, kitai nerima peminta tinggi mansutka pemakai enggau ngembuan makit ngelakuka produk kelebih agi ba menua luar nyengkaum Singapore.

“Sebedau tu, kitai ngelakuka produk baka kemiding, ikan patin, tilapia enggau ke bukai ngagai makit Singapore.

“Nadai sapa nyangka produk menua kitai nerima peminta tinggi.

“Tu nunjukka asil betanam betupi enggau produk pemakai kitai bisi pengulih besai dudi hari.

“Aku meda menua kitai makin tegap dudi hari nyengkaum ari sukut belanja.

“Berebak enggau nya, kitai deka fokus nyikap perengkaguna ba menua pesisir nyengkaum bekal ai enggau kuasa karan,” terang iya.

Abang Johari mansutka jaku nya lebuh bejadika Opis Betanam Betupi Nanga Machan ditu, ensanus.

Iya madahka kelimpah nyendiaka perengkaguna ke moden agi, perintah mega nyendiaka bemacham bantu ngambika rayat kelebih agi pekebun sedia berubah ba pengawa betanam betupi sida.

Nambahka nya, iya madahka perintah nyikap perengkaguna nya ngambika bala pekebun ngemansangka pengawa betanam betupi moden ke meri penguntung besai.

“Aku meri jamin, sektor betanam betupi nyengkaum ba Machan dikemansang.

“Kami dekaka sida (pekebun) ngena peluang tu enggau manah,” terang iya.

Ba lansa sama, Abang Johari madahka inisiatif ngemansang Ulu Rajang nya nandaka pengerasing perintah nentuka peranak ba kandang menua nya enda tinggal ari nerima pemansang.

Ku iya, Ejensi Pemansang Ulu Rajang (URDA) nyadi entara ejensi ti bempu tanggungpengawa nyikap perengkaguna diguna rayat kelebih agi ari sukut infrastruktur.

“RM1.5 bilion diungkup ngagai URDA lalu nya kebuah pemansang ba Batang Rajang ranchak dipejalai.

“Enti suba, projek jalai alun ari Kanowit nuju Kapit engka mimpi aja tang diatu semua nya udah nyadi nyata,” ku iya nyemetak madah.

Abang Johari mega udah ngemendarka peminta ngaga jalai alun Ulu Machan kelimpah ngagihka RM3 juta ungkup ngemanah Waterfront Sungai Machan.

Sama datai Sapit Kepala Menteri Datuk Amar Douglas Uggah Embas, Menteri Dagang Dalam Menua enggau Pekara Penguna Datuk Alexander Nanta Linggi enggau Adun Machan, Allan Siden Gramong.