KUCHING: Deriba e-hailing enggau pengajar orang deriba entara raban ti diselinting nerima Bantu Khas Sarawakku Sayang 4.0 (BKSS 4.0).

Kepala Menteri Datuk Patinggi Abang Johari Tun Openg madahka bantu RM500 deka diberi sekali aja ngagai deriba e-hailing enggau instruktor deriba di menua tu.

“Ba bulan Julai nyin kemari, Perintah Sarawak udah mantu raban pemain sektor perengka pengangkut ti kena pangka balat ketegal Covid-19 baka deriba teksi, deriba bas enggau van sekula, pemai van belesen enggau penambang di menua tu.

“Enda ninggalka deriba e-hailing, bala Kabinet aku mutuska meri bantu ti sama ngagai 2,396 iku deriba e-hailing enggau 781 iku pengajar deriba di Sarawak,” ku iya.

Abang Johari bejaku munyi nya ba aum pemberita BKSS 4.0 di Wisma Bapa ditu, kemari.

Kenu ku iya, Perintah Sarawak udah ngagihka RM1.59 juta ungkup bantu tu.

“Bantu RM500 nya deka dibayar nengah Sarawak Pay dalam timpuh tiga bulan sebedau ujung taun tu.

“Rintai nama penerima ti bulih bantu tu deka diambi ari rikod Opis Kerita Darat (JPJ),” ku iya.

Kelimpah ari nya, ku Abang Johari madahka entara bantu bukai ti diberi nengah BKSS 4.0 tu iya nya diskaun nyuwa pasar enggau kedai.

“Diskaun 50 peratus ungkup nyuwa pasar enggau kedai dalam timpuh tiga ari bulan Oktober nyentukka Disember taun tu.

“Bantu tu dikearap meri pemaik ngagai lebih 10,000 iku pedaja ti nyuwa pasar enggau kedai kelebih agi ba baruh Kaunsil Kandang Menua.

“Nengah bantu tu Perintah Sarawak udah ngagihka RM0.8 juta belanja,” ku iya.

Berebak enggau nya, iya mega madahka BKSS 4.0 tu mega meri bantu ngelaungka chukai permit enggau lisin.

“Perintah Sarawak deka nerus ngelaungka bayar chukai permit enggau lisin ngagai orang dagang, pedaja, pedaja ba pasar malam enggau pedaja di tamu.

“Semua pemegai permit enggau lisin ari ejensi bekuasa kandang menua di selampur Sarawak nerima pemaik tu.

“Bantu tu dikearap ulih ngelempungka tating belanja rayat ke alai Perintah Sarawak udah ngagihka belanja RM4.12 juta ngagai bantu tu,”ku iya.

Nangkan nya, Abang Johari mega madahka BKSS 4.0 nya bisi meri kelaung suwa ngagai orang dagang mit enggau jelan pemesai (PKS) ke bejalaika dagang sida ba premis serikat bekaul perintah (GLC) enggau gerempung bekanun menua.

“Perintah Sarawak deka neruska kelaung bayar suwa ngagai PKS ti bejalaika dagang ba GLC baka Opis Pemansang Ekonomi Sarawak (SEDC), Lembaga Pembangunan dan Lindungan Tanah (LCDA) enggau Gerempung Pemansang Menua Bintulu (BDA) ungkup timpuh tiga bulan nyentukka bulan Disember taun tu,” ku iya.