KUCHING: Bisi 16 kes baru positif Covid-19 di Sarawak kemari mungkur 15 di Pelilih Kuching enggau siti di Pelilih Serian ngujungka kes nambah ngagai 796 kes.

Komiti Penyangga Penusah Ngenyit Nengeri Sarawak (JPBNS) madah, seharitu nambah siti kluster baru di Pelilih Kuching iya nya Kluster Seladah.

“Mungkur tujuh kes positif Covid-19 ba Kluster Seladah nyengkaum kes indeks.

” Tu ngujungka kluster di Sarawak nambah ngagai empat Kluster, “ku penerang nya.

Kluster Bah Arnab enggau Kluster Putra nadai ngerikod kes tang Kluster Baki bisi ngerikod tiga kes positif Covid-19 kemari.

” Kes positif Covid-19 kemari ti ngaul kes ke-781 nyentuk 787 tu di kena rampit ketegal kala bejalai ngagai Semenanjung sebedau tu.

” Nangkan nya mega, kes ke-788, 789 enggau 790 ti bisi kaul semak ngagai kes Kluster Baki, lalu kes ke-791, 793,794 enggau 795 mega bisi kaul semak ngagai kes Kluster Seladah.

” Kes ke-792 enggau 796 tu ketegal bisi kaul semak enggau kes ti positif RTK Antigen,”ku penerang JPBNS.

JPBNS mega nerang bisi siti kes baru udah suman enggau dikemendar pansut ari sepital kemari. Kes udah suman enggau dikemendar pansut ari sepital iya nya ari Sepital Besai Sarawak.

Tu ngujungka kes positif Covid-19 udah suman enggau dikemendar pansut ari sepital nambah ngagai 728 iku tauka 91. 46 peratus.

Kes diperubat ba sepital ti mungkur 50 kes iya nya 43 di Sepital Besai Sarawak enggau tujuh di Sepital Miri.

Ba penerang JPBNS mega madah nadai kes Covid-19 ti berubat ba ICU enggau kes pemati mengkang 19 iku tauka 2.39 peratus seraya 18 PUI baru diripot enggau empat kes PUI nganti pemutus makmal.

Di Pelilih Kuching mega agi mengkang ba status kuning enggau kesemua penyampau iya nya 26 kes dirikod dalam timpuh 14 hari ke udah.