KOTA SAMARAHAN:  Perintah Sarawak meri fokus ngagai agenda pemansang menua ungkup nyapai visyen nyadi nengeri pemadu maju ba taun 2030, ku Kepala Menteri Datuk Patinggi Abang Johari Tun Openg.

Kenu ku iya, agenda pemansang nyadi pekara pemadu beguna enti dibanding enggau isu berebut kuasa dalam politik.

“Kitai ditu enda rindu enggau bepolitik laban kiruh ngerunding pasal perengka jalai alun, kuasa karan enggau bekal ai, kitai kiruh ngatur nengeri,”

“Ditu, rayat ulih meda kitai enda berebut-rebut deka ngulihka pangku pengawa baka ti nyadi di Semenanjung ti berebut deka nyadi Menteri Besai,” ku iya.

Abang Johari bejaku munyi nyerumba Pengawa Nasih Tanah Projek Nyeruri Lima Jalai Lawit Sepemanjai Jalai Kuching Samarahan ditu, kemari.

Tandu iya, Perintah Sarawak bebendar ngemansangka menua tu dikena nentuka rayat bulih pemaik ari pemansang ti digaga.

“Sarawak benasip manah laban enda bepanggai ngagai Perintah Besai ari sukut belanja ungkup pemansang laban kitai ulih melanja projek insfrastruktur enggau duit kitai empu.

“Bisi piak betanyaka pengulih kitai dalam ngaga pemansang tang nitihka konstitusyen kitai ulih ngenaka chukai ngagai Chukai Jual Nengeri (SST) atas minyak enggau gis menua.

“Kitai mega bebendar ngambi hak nya, taja pan ya Petronas enggai mayar ti ngujungka aku mai pekara nya ngagai kort tang pemutus kort nyangkung kitai,” ku iya.

Iya madahka, empas ari nya Sarawak ulih ngumpul belanja tambah RM3 billion setaun ke alai duit nya deka diberi pulai ngagai rayat baru nengah projek insfrastruktur sereta perengkaguna ti lebih manah.

“Setaun kitai bulih RM3 billion dalam timpuh lima taun iya deka nyadi RM15 billion.

“Penatai pemisi nengeri betambah lalu ulih diguna ungkup projek pemansang nyendiaka perengkaguna ngagai rayat,” ku iya.