KUCHING: Sekretari Ketuai Nembiak Parti Sa’ati Rayat Sarawak (SUPP), Milton Foo madah kitai mesti nguna chara baru maya bepolitik ngambi ulih nagang pengerekai Covid-19 ba menua tu.

Ku iya, gempuru besai enggau semua licha ngaul mensia mayuh ba timpuh bekimpin tu enda tau dipejalai enti sema hari ngundi diatur.

“Pia mega kitai mesti nagang orang luar tama ke Sarawak bekimpin ditu,” ku iya nerang.

“Aku ngarapka rayat Sarawak besaup nagang penanggul tu,” ku iya.

Ba penemu Milton, sebarang pekara tauka aum begulai enggau pengundi ulih dipejalai nengah aplikasyen Facebook enggau Zoom.

“Pengawa ngundi ba Korea Selatan nya pansik kes ke manah ditunda Komiti Penyangga Penusah Ngenyit Nengeri (JPBN) enggau Komiti Pengawa Bepilih (SPR) enti pengawa ngundi diatur ba menua tu,” ku iya nerang silik.

“Taja kes Covid-19 ba Korea Selatan agi ulih ditagang, Palan Penyangga enggau Nagang Igi Penyakit Korea (KCDC) enggau Komiti Pengawa Bepilih Nasional (NEC) tetap mantu perintah netapka atur ba palan ngundi,” ku iya.

Milton mega madahka ulah ex-Menteri Besai Parti Demokrat ti bediri minta pilih ba Jongno, Lee Nak-Yeon mesti ditunda pengudah iya semina ngatur randau ba Youtube begulai enggau chalun parti kenyau ari bulan March tu tadi.

“Nangkan nya, chalun Parti Demokrat ti bediri minta pilih ba Goyang, Moon Myung-soon madah ngagai Asia Times sentang bisi bida ari sukut iya ngatur kimpin sekali tu dibanding ba taun 2012 suba,” ku Milton.