KUCHING: Siti Kluster baru dirikod kemari di Pelilih Kuching iya nya Kluster Baki ngujungka kluster di Sarawak nambah ngagai tiga kluster.

Komiti Penyangga Penusah Ngenyit Nengeri Sarawak (JPBNS) madah, tu ngujungka kluster di Pelilih Kuching mungkur dua kluster iya nya Kluster Bah Arnab enggau Kluster Baki ti baru dirikod kemari sereta siti kluster agi ngerekai di Pelilih Bintulu iya nya Kluster Putra.

“Penyampau kes dirikod di Kluster Baki iya nya mungkur lima kes nyengkaum kes indeks.

“Kluster Bah Arnab enggau Kluster Putra bela nadai ngerikod kes positif Covid-19 baru kemari,” ku penerang nya.

Nangkan nya, Pelilih Bintulu diatu udah status gadung laban nadai ngerikod kes dalam timpuh 14 hari ke udah lalu Pelilih Kuching agi mengkang ba status kuning.

“Kemari ngerikod lapan kes positif Covid-19 di Pelilih Kuching ngujungka kes nambah ngagai 780 kes.

Kes ke-773 ti kena dirampit ketegal bisi kaul semak enggau kes ke-752 enggau ke-759 ti udah dirikod positif Covid-19 sebedau tu, lalu kes ke-774, 775 enggau 776 bela bisi kaul semak enggau kes ke-768 ti udah dikenuku positif Covid-19 kena 18 Oktober empai lama.

Kes ke-777 enggau 778 mega dikenuku positif Covid-19 laban bela bisi kaul semak enggau kes ke-771 ti ripot positif kena 23 Oktober tu tadi.

Kes ke-779 mega dikenuku positif pengudah diperesa Covid-19 di sepital peribit laban deka ngadaka anak enggau chara ‘caesarean’ enggau kes ke-780 tu ngaul pengereja tukang paip ti bisi mandangka kelai baka batuk, pedih rekung enggau pedih isi kenyau 22 Oktober.

“Semua kes nya bela ari peranak menua Pelilih Kuching tu empu ti dikenuku positif Covid-19 kemari, mungkur lima kes ti bisi kaul semak enggau kes ke udah dirikod sebedau tu enggau dua kes enda temu kaul dikena rampit Covid-19,” ku penerang nya.

JPBNS mega madah bisi enam kes baru udah suman enggau dikemendar pansut ari sepital kemari. Semua kes udah suman enggau dikemendar pansut ari sepital iya nya siku ari Sepital Besai Sarawak enggau lima ari Sepital Bintulu.

Tu ngujungka kes positif Covid-19 udah suman enggau dikemendar pansut ari sepital nambah ngagai 727 iku tauka 93.21 peratus.

Kes diperubat di sepital ti mungkur 34 kes iya nya 27 di Sepital Besai Sarawak enggau tujuh di Sepital Miri.

Ba penerang JPBNS mega madah nadai kes Covid-19 ti berubat ba ICU enggau kes pemati mengkang 19 iku tauka 2.44 peratus seraya 19 PUI baru diripot enggau lima kes PUI nganti pemutus makmal.