KOTA SAMARAHAN: Kepala Menteri Datuk Patinggi Abang Johari diau diri bekaul enggau sebarang isu politik ba renggat Perintah Besai nyentukka penerang media rasmi ari Astana Negara.

Kenu ku iya, pengamat berita di media rama agi mar dikearap nyentuk piak Istana Negera ngeluarka penerang rasmi.

“Pengudah bulih penerang rasmi ari Astana Negara enggau penerang sentang isu ti nyadi, baru aku ulih meri penemu.

“Naka tu aku enggai meri timbal laban aku enda nemu penerang isu ti ayan kelebih agi bekaul dawa ari media rama,” ku iya.

Abang Johari bejaku munyi nyerumba pengawa Nasih Tanah Projek Nyeruri Lima Jalai Lawit Sepemanjai Jalai Kuching Samarahan ditu, kemari.

Abang Johari ti mega Chairman GPS mega dipinta ngelansa pasal pengawa Menteri Besai Tan Sri Muhyiddin Yassin ti betemu enggau Yang Di Pertuan Agong lebuh bisi penerang ngasuh madamka Parlimen enggau atur bekurung politik.

Iya nyemetak madah, isu nya pedis mimit lalu enda ulih ditimbal sengapa enti enda nemu pekara nyemetak.

Hari Lima tu tadi, Menteri Besai didawa bulih setuju betemu enggau Agong bagi mutarka penanggul politik enggau nyeliahka lebih mayuh agi konflik dalam aum Parlimen ti deka datai.

Maya tu perintah ti semina teulihka 113 sukung kaban Dewan Rayat, Muhyiddin ti nyadi Menteri Besai nyadi tuie ketuai politik bukai.

Kabinet diperita ngasuh Muhyiddin mantaika perambu nya awak diperunding Agong empu.

Berebak enggau nya, Istana Negara nengah Datuk Pengelola Bijaya Diraja Datuk Indera Ahmad Fadil Shamsuddin madahka Yang Di Pertuan Agong Al-Sultan Abdullah Ri’ayatuddin Al-Mustafa Billah Shah Ibni Almarhum Sultan Haji Ahmad Shah Al-Musta’in Billah setuju ngatur aum enggau Raja-Raja Melayu di Istana Negara enda lama agi endur berundingka perambu ti dibantaika Muhyiddin.

“Al-Sultan Abdullah ngelalau semua rayat diau jenuh, anang irau lalu besabar dalam napi pekara ti nyadi seraya nganti pemutus pasal perambu nya.

Semua rayat mega dilalau anang guai mantaika sebarang peragm penemu ti ulih ngenataika pengirau ati sereta tau ngeruga pengelikun menua,” ku iya.