KUCHING: Naka tu bisi 1,396, 886 hektar tanah udah disukat kelingi ba baruh Seksyen 6 Kanun Tanah Sarawak.

Menteri Muda Betanam Betupi, Tanah Adat enggau Pemansang Kandang Menua ti mega Mandal Presiden Parti Bumiputera Bersatu (PBB) Datuk Roland Sagah Wee Inn madahka ari penyampau nya bisi 42,962 hektar tanah udah disukat ungkup orang kediri.

“Nangkan nya, Perintah Sarawak udah ngeluarka 6,898 hektar geran tanah.

“Nyukat tanah ba Seksyen 6 beguna dikena nentuka tanah ti disukat endang tanah NCR (Tanah Adat Bansa Bumiputeral) sereta enda ngerampit tanah orang bukai tauka tanah perintah,” ku iya.

Roland bejaku munyi nya ba Program Strategic Sharing: NCR Land beserimbai Aum Besai PBB di Palan Aum Borneo Kuching (BCCK) ditu, tadi.

Tandu iya, tanah ti disukat ba baruh Seksyen 6 mega ulih diatur lengkas agi.

“Udah tanah nya disukat, Perintah Sarawak ngatur mayuh program transformasyen dalam sektor betanam betupi ungkup pemaik rayat.

“Penyampau Asil Dalam Menua (KDNK) Sarawak dalam sektor betanam betupi manggai RM14.72 billion tauka 13.5 peratus.

“Penatai KDNK dalam sektor betanam betupi tu dibagi ngagai tiga iya nya utai tanam RM10.38 billion, jelu tupi RM0.03 billion enggau berikan RM0.74 billion,” ku iya.