KOTA SAMARAHAN: Lima buah jalai lawit ari Kuching ke Samarahan ke beungkus RM60 juta deka diseruri menyana agi.

Menteri Muda Infrastruktur enggau Pemansang Penyangkai Kapal Datuk Julaihi Narawi madahka projek nya siti ari inisiatif Perintah Sarawak dalam nentuka pelin timpuh pandak mutar penanggul sekut jalai ari Kuching ke Samarahan.

“Projek nyeruri lima buah jalai lawit tu iya nya dua buah selingkut jalai ba Pelilih Menua Kuching ti dikumbai Stutong Gyratory (Selingkut Jalai Stutong) enggau KORR 2 Gyratory (Selingkut Tabuan Tranquility).

“Tiga buah agi selingkut di Pelilih Menua Samarahan dikumbai G1 Gyratory (Jalai Lawit ILP Sarawak), G2 Gyratory (Jalai Lawit Pusat Jantung Sarawak) enggau G3 Gyratory (Jalai Lawit sebedau INTAN),” ku iya.

Julaihi bejaku munyi nyerumba Pengawa Nasih Tanah Projek Nyeruri Lima Jalai Lawit Sepemanjai Kuching-Samarahan ditu, kemari.

Datuk Julaihi Narawi

Tandu iya, tiga buah selingkut jalai tu deka dipasang lampu trafik Smart ke alai dua buah agi deka diseruri ngagai ‘punch through’ selingkut jalai.

“Projek tu dipelaba deka muntang pejalai ari 60 minit nyadi 30 minit maya jam orang benung mayuh ba jalai alun.

“Ungkus belanja ngaga selingkut jalai tu ditanggung Perintah Sarawak lalu dipelaba tembu ba taun 2022,” ku iya.

Berebak enggau nya, ku iya bagi timpuh panjai jalai alternatif Kuching-Samarahan Expressway benung dalam proses perambu enggau benung dilangkar.

“Jalai baru Kuching-Samarahan tu deka disereta sebuah jematan ngelayang Sungai Sarawak nyadi jalai alternatif ke alai projek nya digaga ba baruh program Coastal Road Network.

“Jalai alternatif tu mega ditanggung penuh Perintah Sarawak.

“Enggau projek jalai alternatif tu, kitai ngarapka penanggul jalai sekut Kuching-Samarahan ulih diputarka kelebih agi lebuh maya orang mayuh ngena jalai alun,” ku iya.

Kenu ku Julaihi, diatu kereja ba palan kunteriktor udah bepun beroperasyen nitihka Atur Pengawa Standard (SOP) ti udah ditetapka.

Iya mega meransang bala pemain kunteriktor awak nitihka SOP dikena nyamin pengelikun enggau pengerai pekeraja sida ari Covid-19 tauka bakal ba palan kereja.

Sama bisi datai Menteri Kaunsil Kandang Menua enggau Pengawa Berumah Datuk Sri Prof Sim Kui Hian, Kaban Parlimen Kota Samarahan Rubiah Wang, Adun Stakan Datuk Sri Ali Mahmud, Adun Muara Tuang Datuk Idris Buang enggau bala bukai.