SELANGAU: Semilan buah rumah panjai di Bukit Ambun, Jalai Selangau Mukah ditangkan ngambi numbuhka gerempung tuai rumah.

Kaban Kunsil Nengeri (Adun) Tamin Ir Christopher Gira Sambang madah, nengah gerempung nya sida semenua deka lantang agi ngaul diri enggau opis sereta ejensi perintah.

“Aku ngarapka semilan buah rumah panjai ditu ulih numbuhka Gerempung Tuai Rumah ti deka nyadi siti platform alai kita Bukit Ambun bekaul enggau opis tauka ejensi perintah.

” Penumbuh gerempung tu deka ngemeratka penemu sereta pengelantang peranak rumah panjai Bukit Ambun,” ku iya.

Iya mantaika jaku tu maya Program Pemesai Begulai Enggau Semilan Komiti Pemansang enggau Pengelikun Genturung Pendiau (JKKK) Bukit Ambun, Jalai Selangau Mukah di Rumah Tuan Entili, ensana.

Ba pengerami nya, Gira mega besemaya deka mending sereta meratika penemu enggau penanggul ke dibantai bala tuai rumah enggau peranak rumah panjai nya ngagai iya.

“Penanggul ke dibantai bala tuai rumah ti nuntung rayat menua Bukit Ambun tu deka diperati ngambika ulih diputar ketegal kitai ngira pengelantang pengidup rayat ditu,” ku iya madah baru.

Sama bela datai maya pengerami tu iya nya Senator Rita Insol, Sekretari Politik Kepala Menteri Edwin Banta, bala tuai raban bansa sereta tuai rumah