KUCHING: Sekula Sekondari (SMK) Wira Penrissen diasuh tutup bepun seharitu (26 Oktober) pengelama tujuh hari pengudah siku pelajar dia dikenuku positif Covid-19.

Direktor Pelajar Sarawak, Abang Mat Ali Abang Masagus madah, nutup sekula nya ti deka ngulihka pengawa meresi enggau infeksyen dipejalai ba sekula nya.

” Opis Pengerai Nengeri udah ngenukuka siku pelajar SMK Wira Penrissen positif Covid-19.

“Nya alai, sekula nya diasuh tutup pengelama tujuh hari ti bepun 26 Oktober (seharitu) nyentuk 1 November bulan baru,” ku iya.

Abang Mat bejaku munyi nya ba sebengkah penerang dikunsi iya enggau media, seharitu.

Kenu ku iya, pengetua patut nentuka bala pengajar gawa ari rumah enggau bejalaika pengawa ‘pengajaran dan pembelajaran’ ari rumah.

“Pekara nya bepelasarka pengulih enggau engkeman akses ngagai komunikasyen pelajar sepanjai timpuh nutup sekula nya,” ku tandu iya.

Sebedau tu, Opis Menteri Pelajar Malaysia (KPM) nengah sebengkah penerang madah ba Mesyuarat Khas Kaunsil Pengelikun Menua (MKN) bekaul Pengatur Covid-19 ti dipengerusi Menteri Besai Tan Sri Muhyiddin Yassin bisi madah, dedini sekula di selampur menua tu ti bisi ngerikod kes positif Covid-19 patut ditutup ba timpuh tujuh hari kelimpah enda nganti raban pemeresa ari Opis Menteri Pengerai Malaysia (KKM).