LONG LOYANG : Sapit Kepala Menteri Datuk Amar Douglas Uggah Embas pechaya Perintah Sarawak dipegai GPS keran nyapai juluk nambahka pemansang ba kandang menua pesisir.

Ku iya, penumbuh Kaunsil Pemansang Tanah Tinggi (HDA) ba Telang Usan nya nunjukka pengeran perintah bejalaika pemansang ba menua pesisir.

“Ba renggat keterubah, urung RM1.5 bilion diungkup bejalaika perengkaguna pemun baka jalai alun enggau jematan ke chukup besai guna ngagai rayat.

“Nya kebuah, pengari rayat GPS iya nya Adun Telang Usan enggau pengari rayat bukai deka bebendar gawa ngemujurka pekara tu,” ku Uggah.

Uggah mansutka jaku nya ba Pengawa Nutup Program Betanam Betupi Ngaul Komuniti (AgriCOP) ba Balai Raya Kampung Long Loyang, ditu kemari.

Iya ngelalau rayat anang ngachau inisiatif ti benung dipejalai enggau anang ngembuan runding deka nyukung chalun bukai kelimpah ari GPS maya pengawa bepilih.

“Agi tubah pemansang apin tembu dipejalai kitai kelimpah Perintah Sarawak benung merambu projek pemansang di baruh Langgur Pemansang Malaysia Lumpar Ke-12 (RMK12),” terang iya.

Nangkan nya, Uggah ti mega Menteri Muda Betanam Betupi Moden, Tanah Adat enggau Pemansang Kandang Menua ngaku, Telang Usan ngembuan mayuh tanah enggau bisi pengulih besai dikemansang ungkup pengawa nanam kopi, rian, nanas enggau terung asam sereta nupi babi.

Ku iya, empat Program AgriCOP udah dipejalai ba kandang menua nya enggau peminta pengari rayat dia deka ngatur tiga bengkah program ke sebaka deka dikerunding.

Nambahka nya, RM2 juta udah diungkup bejalaika bemacham rintai program enggau pengawa betanam betupi.

Ba program nya, Uggah mega madahka agih belanja tambah penyampau RM500,000 ungkup tuju ke sebaka.

Berebak enggau nya, Uggah mega ngagihka bantu penyampau RM40,000 ungkup ngemanah entali ai ba umai Long Anap.

Uggah mega madah, Komiti Pemansang enggau Pengelikun Genturung Pendiau (JKKK) Kampung Long Loyang udah nerima RM30,000 lalu Biro Indu iya nerima RM10,000.

Direktor Opis Betanam Betupi, Dr Alvin Chai madah, bisi 250 penyereta udah ngulu bemacham kus ti bisi diatur nyerumba Program AgriCOP nya.

“Program AgriCOP tu udah diatur ke-15 kali ba Bagi Menua Miri enggau keempat ba Telang Usan.

“Aku ngelalau rayat ditu ngepunka pengawa betanam betupi dikena nambahka bekal pemakai baka nanam kopi, rian, nanas, herba enggau ke bukai ti nerima peminta tinggi,” terang iya silik agi.