SIKU personaliti TVS, Cheryl Syahmina Toh Mohammad ukai semina bajik, pintar tang ngembuan tuju pengidup enggau pintar ngerebut peluang.

Dara bajik penakan Iban Melanau beumur 23 taun tu entara personaliti di TVS gawa nyadi pemacha berita dalam jaku English.

Cheryl deka macha berita dalam jaku English ninting Hari Dua, Tiga, Empat enggau Hari Enam urung pukul 5 lemai.

Suah agi dikangau Cheryl Toh, peranak asal Kuching tu siku graduet Degree dalam bidang Komunikasi (Komunikasi Strategik) ari Unimas.

Taja benung nampung pelajar tikas Master Komunikasi ba Unimas lalu ba taun ketiga, Cheryl madahka pekara nya nadai nekul iya gawa laban diatu iya endang belajarka bidang ke sebaka.

Cheryl Syahmina Toh Mohammad
Foto : Ghazali/ Munirah

“Maya gawa enggau belajar tu, kitai mesti pandai ngatur jam diri ngambika semua pengawa lanchar enggau berurun.

“Pemintar ngatur jam diri maya belajar enggau gawa tu nentuka kitai nyapai tagit diri.

“Taja pia, aku betuah amat laban pangku pengawa tu sebaka enggau bidang dipelajar aku diatu.

“Pengawa dikereja aku diatu, ambika banding lebuh nulis berita.

“Pekara nya meri pengelebih ngagai aku jampat agi nangkap utai dipelajar,” ku iya lebuh dirandau ba opis Suara Sarawak.

Cheryl Syahmina Toh Mohammad
Foto : Ghazali/ Munirah

PEMADU BIAK

Dara bajik bekulit burak tu ngaku iya entara personaliti pemadu biak ba TVS nya siti ari pemar diasaika iya lebuh gawa diatu.

Tang iya berundingka pekara nya nyadika peransang iya ransing agi gawa.

Cheryl mega madah, lebuh gawa kitai mesti bebasaka bakih ke tuai agi, ngembuan runding deka belajar enggau nambahka penemu diri, komited enggau nyaga ulah diri.

Nambahka nya, dara bajik peninggi 166 sentimeter nya ngembuan pengelebih dalam bidang penabur laban bisi peneleba ba nyadi tuai program maya beumur 20 taun.

Peneleba dikembuan iya maya umur 20 taun nya meransang iya nyingkang ke mua lalu pintar ngerebut peluang.

Sebedau tu, Cheryl madahka diri ngembuan juluk ati nyadi pengajar subjek English.

“Tang, semua nya berubah pengudah aku nyadi pengajar Jaku English korporat ungkup orang besai tuai ba sebuah palan belajar peribit dalam taun 2018.

“Lebuh nyadi pengajar ba palan pelajar peribit nya, dia aku sedarka diri rinduka pengawa pasal komunikasyen,” terang iya seraya tuchum manis ngenang peneleba diri.

GAWA NYADI MODEL

Pia mega, Cheryl mega udah nyereta bidang model kenyau ari umur 17 taun.

Nambahka nya, kenang manis ke kala diasaika Cheryl iya nya, iya kala bulih penuduk lima pemadu atas dalam pekit Miss Unity Malaysia 2019 taja nya keterubah pekit kala disereta iya.

Lebuh beratika personaliti TVS tu, Cheryl tau dikumbai kitai chukup pakej laban iya ukai semina bajik tang landik bejaku ba mua kamera.

Ngenang pasal peneleba baru berapa bulan ke udah lebuh nyereta TVS, Cheryl madah iya seruran ngingatka kenang lebuh nerima gerah macha berita keterubah iya kena 10 Oktober tu tadi nyerumba pengawa ngelanchar stesyen televisyen keterubah Sarawak.

“Aku semina dipadah pasal pekara tu, malam sebedau pengawa ngelancharka TV nya.

“Pagi pukul 10 pagi nya aku mesti macha berita lalu nadai dirakam tumu.

“Beduduk ari pekara nya, aku mih pemacha berita keterubah baka nya,” ku iya nerang.

TAKUT SERETA NANGI

“Aku nadai ngadang pekara nya deka nyadi lalu aku ngaku bisi asai takut enggau nangika bisi pengilap.

“Lebuh ngenang baru pekara ke udah nyadi, aku berasai lantang ati laban udah naka ulih mantaika penau diri ungkup terubah iya.

“Tang aku meri besai terima kasih ngagai pengeluar program laban meri peluang ngagai aku mantaika pengelandik diri.

“Aku mega berasai temegah laban ulih ngemujurka pekara nya,” ku iya seraya madahka diri agi kesal enggau rawan ati maya macha berita.

Cheryl mega merambu deka nyadi pemacha berita tetap seraya madahka diri siku orang ti komited bejalaika pengawa.

Berebak enggau nya enti diberi peluang, iya mega deka nyadi Tuai Program ti fokus ngagai pemansang raban nembiak enggau politik.

“Ba penemu aku, enti deka nyadi pemacha berita ti nyulut, kitai mesti ngembuan ulah ke manah, sedia berubah enti bisi ngereja penyalah tauka pengilap, chakah gawa, ngembuan runding ti tegap, landik bejaku enggau pintar mutarka penanggul ke nyadi.

“Ari sukut jaku, kitai mesti mayuh macha bup enggau nambahka pengelandik bejaku kelimpah bagas belajarka pekara baru sereta ngaga pansik.

“Aku ngaku ukai muntang nyadi pemacha berita baka ke suah dipeda kitai ba TV.

“Kebuah pia laban lebuh macha brita, kitai ukai semina macha aja tang mesti nemu chara ngenataika berita nya ngambi utai ke deka dipadah ditemu bala mayuh taja kitai bejaku semina 15 minit aja,” terang iya silik agi.

MESTI LANDIK BEJAKU

Nya kebuah ku iya, pemacha berita ukai semina macha tang kitai mesti ngembuan pengelandik komunikasyen nitihka gaya berita dibacha kitai.

Cheryl madah, Felo Kanan Kaunsil Profesor Menua ti mega pemikir politik, Dr Jeniri Amir nyadi mentor enggau peransang ngagai iya laban ex-pengelicha iya nya siku orang ti pintar, landik bejaku, jampat mutarka penanggul ke nyadi enggau pandai ngaduka pengawa.

“Dr Jeniri tu landik enggau nadai penangi mantaika tanya ti nyemetak ba sebarang pekara ke nyadi ba menua tu lalu aku empu mega suah mantaika tanya nyemetak baka nya.

“Ari nya aku meda kami duai ngembuan ulah ti sebaka,” ku Cheryl seraya madahka Najwa Shihab ti mega tuai program enggau pemberita tebilang Indonesia nyadi peransang iya dalam dunya penabur tu.

Beduduk ari nya, Cheryl madahka diri berasai betuah laban sida sebilik, pengelicha enggau bala bakih seruran nyukung pejalai iya nyadi pemacha berita.

“Kami sebilik, pengelicha sereta bala bakih ba Unimas temegah enggau penyulut dijapai aku diatu laban aku udah ngemegah nama fakulti.

“Aku berasai chukup temegah enggau meri terima kasih laban udah meri peluang mantaika penau diri.

“Aku ngarapka pekara tu deka nyadi peransang ngagai bala bukai bisi ati ngaul diri dalam industri tu,” ku iya nyimpul randau enggau Suara Sarawak.