KUCHING: Kaban Parti Pesaka Bumiputera Bersatu (PBB) dilalau regas agi nguna media rama dikena napi Pengawa Bepilih Nengeri (PRN) Sarawak Ke-12.

Mandal Presiden Kanan Parti Pesaka Bumiputera Bersatu (PBB) Datuk Seri Fadillah Yusof madah, begunaka media rama nya nyadika siti pelasar ulih ngenataika pesan enggau propaganda ti ulih narit buah runding mensia mayuh bekaul agenda pemansang Gempung Parti Sarawak (GPS).

“Begunaka media rama jeman diatu beguna amat kelebih agi kitai deka napi PRN Ke-12 berindik enggau napi pandemik Covid-19.

“Kitai mega enda ulih bejalaika pengawa bekimpin ari rumah ke rumah laban enda ulih begempuru bebala mayuh, nyadi nya meh guna kitai patut begunaka media rama,” ku iya.

Fadillah madah munyi nya rambau Aum Konvensyen Khas Parti Pesaka Bumiputera Bersatu (PBB) Zon Selatan ba Palan Aum Besai Borneo Kuching (BCCK), ditu kemari.

Nangkan nya iya madah semua kaban parti ditu patut sikar nyakal jaku tempa ngagai Gempung Parti Sarawak (GPS) enggau PBB di media rama sereta anang ngawakka pekara nya pia aja.

“Pekara nya tau meri empas ngagai parti baka udah dipeda lebuh Pengawa Bepilih Besai (PRU) ke-14 ba taun 2018, Barisan Nasional (BN) alah ketegal jaku tempa di media rama.

“Aku ngelalau semua pengari rayat enggau ketuai GPS di semua renggat ditu awakka ngaul diri begunaka media rama ti ulih mutar sebarang isu bisi dikenatai ba belah media rama,”ku iya enggau silik.

Nengah media rama mega ulih ngenataika pesan ti betul ngagai rayat, laban ukai semina bepanggai ba ‘administration’ aja tang kitai empu patut ransing agi begunaka media rama, ku tandu iya.