SARATOK: Malaysia diatu begunaka langgur penemu ti tegap dalam nentuka rayat selamat enggau gerai.

Sapit Menteri Karan enggau Pengeraja Asal Ali Biju madahka perambu tu begunaka strategi dalam ngangkatka ekonomi awakka industri enggau dagang menua bejalai enggau manah.

“Penyarut politik menua kitai tau ngasuh pemeranak puku nangi deka beranakka puku.

“Perintah begunaka sukung tu dalam ngelaban pengerekai Covid-19 ngambika ekonomi menua kita enda diruga,” ku iya dalam siti penerang media sehari tu.

Ali ke mega Kaban Parlimen Saratok madah politik ti enda tentu tu udah ngachau pekara dagang dalam menua.

Kenu ku iya, Atur Bekurung ti dipelaba deka dipadahka enda begunaka atur ngena raban soldadu tauka nyekat pengawa ekonomi.

“Tu reti iya rayat enda ditating dalam pekara dagang lalu sida ulih ngereja pengawa baka selama.

“Semina Parlimen aja ti digantung, reti nya aktiviti politik maya nya disekat awakka orang ti besai nyawa nadai ulih madahka sapa-sapa ngempu kuasa besai,” ku iya.

Ali mansutka pekara nya lebuh nimbal penerang dipansutka luyar Tommy Thomas ti madahka atur bekurung ti deka dipejalai Menteri Besai Tan Sri Muhyiddin Yassin enda nitihka konstitusyen menua.