KUCHING: Moratorium pinjau deka dilanjar tiga bulan agi nyentukka ujung (Disember) taun tu, ku Datuk Patinggi Abang Johari Tun Openg.

Kepala Menteri madah moratorium pinjau nya deka disambung nyentuk bulan Disember tu ila.

“Tu siti ari chara kitai mantu orang tusah laban perintah Gempung Parti Sarawak (GPS) endang ngemeranka pengasih ngagai rayat.

“Agi pan nya endang kereja kitai lebuh nyadi perintah iya nya meri perati dulu ngagai rayat,” ku iya.

Abang Johari bejaku munyi nya beserimbai Aum Besai Khas Parti Bumiputera Bersatu (PBB) di Palan Aum Borneo Kuching (BCCK) ditu, kemari.

Datuk Patinggi Abang Johari Tun Openg

Ku Abang Johari, dalam kandang tiga taun iya udah nyadi Kepala Menteri mayuh udah pemansang udah dibai iya ngagai Sarawak.

“Aku negapka infrastrutur di Sarawak, ngaga jalai alun pemun di menua pesisir, ngaga jematan, nyengkaum nyeruri jalai lawit.

“Nya alai, lebuh Perintah Pakatan Harapan (PH) nginsil pengawa ngaga jematan di Sarawak kami di PBB terus neruska projek nya ketegal ngerunding rayat.

“Lebuh ngaga jematan kitai begunaka belanja ti besai, dia kami sebuat ngiga chara ngiga belanja ngenaka chukai SST atas minyak enggau gis,” ku iya.

Taja pia, ku iya Petronas enggai mayar chukai SST nya.

“Aku enda peduli. Aku saman Petronas ba kort ke alai pemutus kort madahka kitai menang. Nengah chukai tu rejeki menua kitai nambah RM2.9 billion. Nya alai, dalam timpuh lima taun agi aku melaba semua jalai alun ulih tembu,” ku iya.

Iya ti mega Presisen PBB meransang orang ti ngaul diri dalam industri betanam betupi ngambika ngemerankan chara betanam betupi moden.

“Lebuh jalai alun udah datai, tanah deka ulih dibuka ungkup betanam betupi moden baka Internet of Things (IoT) enggau fertigasyen.

“Kitai benasip laban lebuh pengerekai penyakit Covid-19 nuntung, rayat menua udah nemu ngena pekara digital bejual sayur, ikan enggau pemakai nengah online.

“Enti enda maya tu kitai agi tekusil-kusil belajar ngena digital laban udah tinggal,” ku iya.

Tandu iya, taja pan mayuh orang madah pekara digital tau ngenataika berita bula enggau ‘fitnah’ tang sida sanggup napi risiko nya laban ngembuan ati ti lurus ungkup pemaik rayat.

“Ngena media rama tu kitai mesti nemu besilat. Enti orang ngutuk PBB ba media rama kitai mega nyilat ngena media rama,” ku iya.

Sama bisi datai Sapit Kepala Menteri Datuk Amar Douglas Uggah Embas, Sapit Kepala Menteri Datuk Amar Awang Tengah Ali Hasan, Mandal Presiden Kanan PBB Datuk Seri Fadillah Yusof, Menteri Kaunsil Kandang Menua enggau Pengawa Berumah Datuk Sri Prof Sim Kui Hian enggau ke bukai.