KUCHING: Raban pengemeran media menua tu patut mayuh macha bup lebih agi dalam jaku Iban.

Pengajar Graman Ringi madah, kitai tentu deka landik enti udah masai macha enggau nyebut jaku nya.

Ku iya, pengawa ngarang berita endang begunaka jaku ti engkeman, nyemetak enggau mudah ditemu.

“Lebuh kitai ngaga karang sereta nyalin berita, pengawa deka mudah agi enti meretika leka jaku ti deka dikena. Ambika chunto, kitai ukai nyalin leka jaku tang reti jaku nya lalu tu suah agi nitih pengasai ati, jarang bepanggai ba teknik.

“Nya alai kitai enda tau enda matih diri nerenak ulah rindu macha bup enggau kereban bacha dalam Jaku Iban,” ku iya.

Graman Ringi

Iya ke mega mansutka penemu nya rambau Kus Jaku Iban diatur Unit Berita Iban, Stesyen Televisyen Sarawak (TVS) ba Opis SMG ditu, tadi.

Nangkan nya ku iya, kereban sanding ke bukai mega patut diperati ngambi jaku Iban dikena ba karang tauka berita engkeman agi dibacha.

“Taja sistem Jaku Iban ke diatu apin entap tang suah agi jaku dikena kitai entap ba ati diri empu, reti nyamai ditemu.

“Kebendar, enti deka ngasilka karang ti manah dalam jaku Iban, kitai tau nunda chara pengarang asal lalu ngena jaku ti engkeman,” terang iya.

Nambahka nya ku Graman, kitai patut masai diri senentang pekara ti deka disalin lalu bacha baru karang ti udah digaga tauka disalin.

“Endang manah agi enti kitai landik macha dalam jaku Iban, ngansah pengelandik ba jaku bansa diri empu.

“Ari kitai macha tu ulih nerenak ulah siru enggau angkunka jaku bansa diri nipakka juluk Jaku Lati, Bansa Pegari, “ ku iya nyimpul penemu diri pengudah meri licha pasal jaku ti engkeman dikena nyalin berita ari jaku bukai ngagai jaku Iban.

Kus ke diatur sepanjai hari nya digulu urung 12 iku pengemeran media nyengkaum editor, pemantu editor, translator enggau pemberita ari Suara Sarawak enggau TVS empu.