KUCHING: Bala pengerembai berita jaku Iban enda tau enda siru sereta ngembuan pengeliat ati maya ngerembaika berita ngena jaku ti nemban.

Siku pengajar ke gawa ba Opis Pelajar Nengeri (JPN) Sarawak Harold Unsie madah pengarang berita jaku Iban ngempu tanggungpengawa ti besai dalam mansik, nyerungkai, ngusai sereta ngerembaika jaku diri.

“Pengeliat ati tu mesti dikembuan ngambika jaku ti dibantai nya datai ngagai bala peninga ba luar ti angkun deka nemu chara nguna jaku Iban.

“Dalam dunya kemaya hari tu, jaku Iban nadai tinggal ari segang pemansang baka jaku bansa bukai,” ku iya lebuh dirandau pemberita pengudah meri licha Kus Jaku Iban ti diatur Unit Berita Iban, TVS di Opis Sarawak Media Group (SMG) ditu, tadi.

Ku iya, jaku tu siti ari pesaka bansa diri nya kebuah nembiak rebak dudi patut bekenanas belajarka jaku tu ngagai tikas ke tinggi agi.

“Anang enggai belajar bepun ari kitai agi biak baikka sekula primari ngagai tikas ke tinggi ngambika kitai ulih nampung jaku tu enggau nemban.

“Mayuh raban pengajar ti mungkal sereta bebendar ngangkatka jaku Iban diatu mayuh udah pinchin.

“Kita ke rebak baru meh nganti sida ngambika jaku kitai nya majak lati nyentuk ke jemah ila,” ku iya.

Kemari bisi tiga topik dibantai lalu dipejurai ke malin raban pemberita iya nya Sistem Sepil Iban dibantai Harold Unsie, Konsep Enggau Teknik Nyalin Berita (Graman Rengi) enggau Penyilap Rama Dalam Jaku Iban Kemaya Hari Tu (Dr Lambar Lindong).