SELANGAU: Pengeransing Kelab Main Asal Dayak (Kemada) ngangkat sereta ngetanka main asal patut dikemegah.

Kaban Kunsil Nengeri (Adun) Tamin Ir Christopher Gira Sambang madah, pengawa baka tu siti chara dikena nentuka main asal bansa Dayak ulih ditan ngambika enda punas.

“Meri pengaga ati sereta terima kasih ngagai Kemada ketegal pengeransing ngetan lalu ngintu main asal bansa kitai.

“Kemada nyadi siti gerempung ti ransing mai rebak baru enggau bala mayuh sama bela rinduka main asal alai ti tau nyadi chara ke engkeman ngetanka pemanah sereta penyelai pesaka asal bansa kitai tu,” pia ku iya madah.

Iya mantaika jaku tu maya bejadi Penumbuh Kemada lalu bejadika Kelas Ngajat Indu Renggat 2 2020 di Dewan Serbaguna Selangau di Selangau, lemai hari Enam tu tadi.

Nambahka jaku iya, ku Gira, main asal Dayak ukai semina nyadi keresa ke pemadu berega bansa Dayak tang tau diangkat agi ngambika nyadi produk dagang temuai nengeri Sarawak.

Nandu jaku iya baru, ku iya, iya rindu amat meda pengawa Kemada ti ngatur kelas ngajat enggau gendang pampat.

Penyereta kelas nya ku iya, ari bala nembiak berengkah umur enam taun kelimpah bala mayuh ke bukai nyentuk umur 70 taun.

Ba pengerami nya, dikena ngelai sukung iya, Gira nyuaka pemeri RM10, 000 ngagai Kemada ngambika mujur agi bejalaika program sida nangkan ke tu ila.

Sama bela datai maya tu iya nya Senator Rita Insol, Sekretari Politik Kepala Menteri Edwin Banta, Chairman Kemada Jackery Hillary Chukan, bala pemancha, penghulu sereta mensia mayuh ke bukai.