KUCHING: Penyarut politik ba Perintah Besai ketegal ti berebut kuasa bela keran nyadi Menteri Besai nyau baka ti enda nemu badu.

Kepala Menteri Datuk Patinggi Abang Johari Tun Openg madahka penyarut sida nya enda nemu ngetu bepun ujung taun nyin kemari nyentukka sehari tu.

“Suba sida nanya kami nyukung sapa, laban ngerunding deka bisi sebuah Perintah Besai ti likun kami nyukung Tan Sri Muhyiddin Yassin nyadi Menteri Besai. Pia mega, kami berati pengerai rayat lebih beguna enti dibanding enggau pekara politik,” ku iya.

Abang Johari bejaku munyi nya beserimbai Aum Besai Khas Parti Bumiputera Bersatu (PBB) di Palan Aum Borneo Kuching (BCCK) ditu, kemari.

Iya madahka diri empu enda mereti nama kebuah laya berebut ke pangku pengawa nyadi Menteri Besai di Semenanjung enda nemu badu.

Berebak enggau nya iya madahka, taja pan bisi sekeda orang politik ngasuh Pengawa Bepilih Besai Nengeri Ke-12 (PRN12) enda ibuh dipejalai ketegal pengerekai Covid-19 tang ku iya, GPS mesti ngulihka mandat rayat megai perintah.

“Aku nemu pekara pengerai chukup dikemerat maya tu ketegal pengerekai Covid-19 ti balat tang timpuh GPS megai perintah udah deka abis.

“GPS begunaka mandat baru ari rayat endur megai perintah, nya alai kaban PBB mesti nyikap diri napi PRN12 ti nyangka deka diatur sebarang maya,” ku iya.