KUCHING: Serikat Petroleum Sarawak Berhad (Petros) deka ngeluarka tong gis LPG bulan Februari taun baru (2021).

Kepala Menteri Datuk Patinggi Abang Johari Tun Openg madahka tong gis tu ila deka bechura mirah.

“Tong gis tu dikeluarka serikat menua tu empu iya nya Petros. Tong gis Petronas bechura gadung, tong gis kitai bechura mirah,” ku iya.

Abang Johari bejaku munyi nya beserimbai Aum Besai Khas Parti Bumiputera Bersatu (PBB) di Palan Aum Borneo Kuching (BCCK) ditu, kemari.

Kenu ku iya, seagi menua bepanggai ngagai Ordinan Perlombongan Minyak (OMO) dia semua asil baruh tanah nya endang hak menua.

IDUP GPS…Abang Johari (tengah) begulai enggau bala ketuai PBB belagu seraya ngitauka menira PBB enggau GPS rambau Aum Besai Khas Parti Bumiputera Bersatu (PBB) di Palan Aum Borneo Kuching (BCCK) ditu, kemari. Foto Aliep Noni

“Nyema bisi orang deka ngambi asil baruh tanah kitai sida mesti minta lisin ari perintah nengeri. Bisi sebuah menua ngambu Taman Negara Marin di Bintulu enggi sida iya.

“Tang aku madah palan nya ukai enggi sida, nya ti ngasuh aku ngaku (declare) palan nya nyadi Taman Negara Marin Bintulu. Utai ti diining menua nya endang asil ba baruh tanah din,” ku iya.

Abang Johari madahka dalam kandang seminggu tu iya deka mantaika pelasar pasal minyak enggau gis menua tu.

Kenu ku iya, Sarawak deka ngaga stesyen Petros iya nya palan endur nyual minyak, bateri enggau gis hidrogen.

“Bisi orang madah rega hidrogen enggau rega entukar ti ngena hidrogen mar tang kitai bisi visyen dalam pekara tu. Kitai melaba dalam kandang 15 taun ti deka datai rega hidrogen deka nurun sebaka enggau rega telefon binching jeman diatu,” ku iya.

Tandu iya, Sarawak endang deka nyadi pengeluar teknologi gadung ketegal menua tu ngembuan mayuh ai.

“Kitai bisi Tekat Murum enggau Tekat Bakun endur ngaga gis hidrogen. Baru deka bepun dia dua buah serikat Jipun deka bekunsi enggau kitai ngagai Kilang Hidrogen di Bintulu. Ari nya ila kitai ngambi mimit chukai dikena nambahka penatai pemisi menua,” ku iya.