BUKIT TEBUJANG tu mengkang nuchung dedegi ba menua entara Ulu Kabo, Ulu Awik enggau Ulu Sebelak di Saratok.

Tuai Rumah Serudin Ason ari Semambu Ulu di Kabo madah, tiga batang sungai nya endang sama ada tauka pansut ari tuchung bukit nya.

Ku iya, Bukit Tebujang tu kurang lebih 50 kilometer (km) penyauh tauka 40 minit pejalai ari Pasar Saratok enti nengah jalai darat.

“Bukit tu chukup tinggi dibanding enggau bukit bukai ti bisi ngelinggi menua nya.

“Tu mih bukit ti pemadu tinggi ke bisi dikembuan kami ba menua Saratok ditu,” ku iya lebuh dirandau Suara Sarawak.

KEDUA BALI NAMA BUKIT TANGGI

Serudin madah, nitihka tampung cherita orang ke tuai ba menua tu, kelia bukit tu mega kedua bali nama iya dikumbai orang Bukit Tanggi.

Kebuah pia laban lebuh dunya tu ampuh bah kelia ku iya, bukit tu semuti ka mesai tanggui tauka tanggi aja enda ampuh.

“Berindik ari penusah ke nyadi nya, dia orang ti diau enggau nguan menua tu lalu ngangauka nya Bukit Tanggi.

“Pia mega nitihka pengingat siku penulis asal cherita nya, lebuh ai ngampuh ke dunya kelia, ditu mih sekeda bala Orang asal ke diau ngelingi menua tu tepanggai.

“Surut ai, sida lalu diau mendam ngaki bukit tu ke alai bisi 14 buah rumah dientak ngelingi bukit tu.

“Tebal agi sida ke diau ditu iya nya bansa Seru enggau Beketan lalu lebuh sida mendam diau ditu sida lalu betanam ke kayu buah baka rian.

“Nya alai nyentuk sehari tu, agi mayuh amat rian tumbuh sengaki siti bukit ke diberi nama Bukit Tebujang tu,” ku iya nampung kenang sida ke tuai.

PEMINDAH SERU, BEKETAN

Ku iya, nyadi tuai bansa Seru ke pengabis dudi ninggalka bukit tu menya benama Guling enggau Jelema.

Seduai menyadi alah serang laban bansa ke dudi agi baka bala Iban, lari ke Kaki Wong di menua Krian, iya nya enda jauh ari pasar Kaki Wong suba lalu diatu pasar Kaki Wong udah pindah ke Saratok.

Angkat ari Kaki Wong sida ngerarika diri ngagai Bukit Tengalat lalu ari Bukit Rengalat nya, sida nampung pejalai napatka menua Nanga Rajang.

Datai ba Nanga Rajang, sida Guling enggau Jelema sebuat nya tadi lalu nyaruk enggau nampil bansa Melanau lalu madahka diri Melanau nyentuk diatu, lansa Serudin.

“Nyadi Bukit Tanggi tu berubah nama baru, udah bekau bansa Orang Putih ke udu matau dunya kelia begigaka pengeraja asal dalam tanah.

“Bala orang putih bisi nguji ngabas Mas dalam bukit tu. Nyadi kenu ku sida lebuh ditanya, mas dalam bukit tu agi puda, agi mit baru ka mesai babi bujang.

“Nyadi ari jerita nya dia Iban ke mangkang dunya tu lalu ngangauka bukit tu ngena nama Bukit Tebujang nyentuk sehari tu,” tambah iya.

LUMBUNG RAJA BERANI

Serudin nusui silik agi, ba tuchung bukit tu bisi Lumbung Berani kitai Iban benama Tubai, suah dikangau ke bala ngena gelar Lembang Tubu, Tanda Iya Tombang tauka Timpang Berang.

Nyadi lebuh sida ngayau kelia, dia Tubai kena pantap munsuh ba berang, naka pengeraya nyau deka putus.

Meda baka nya, tak lalu ketas bala kaban iya berang ti balat telih nya tadi lalu berang iya ditumbak ke sida ba menua munsuh.

“Abi telih tudah Tubai lalu diperubat ke sida. Laban mensia tu amat berantu, Tubai enda mati taja berang sepiak dah putus.

“Nya alai Tubai tu kelia gayu amat. Iya parai Tuai lalu bangkai iya di anjung bala anak buah iya ke Bukit Tebujang.

“Sentubung niang Tubai tu enda ditumbak baka orang bukai tang semina disadai gaga ke panggau manah-manah.

“Pendam baka tu dikumbai orang tuai kelia lumbung lalu orang sengapa enda ulih dilumbung enti iya ukai Raja Berani.

“Pelilih sungai Kabo ke ditemu aku bisi lima buah lumbung ti digaga beberapa taun ti udah.

“Lumbung Rentap Libau ba Bukit Sibau, Tubai ba Bukit Tebujang, Buyung bansa Beketan ba Tinting Panjai Bukit Sibau, Japing ba tinting Ulu Meruji seraya Atok ba Lubok Embawang, Ulu Kabo.

“Bisi lumbung bukai tang nadai tentu pegari nama, semina nampak berani aja,” ku iya nyimpul kenang diri.