KUCHING: Pengajar subjek Sains enggau Matematik ba Sekula Primari Perintah (SK) deka dilatih baru ba empat buah Palan Pematih Pengajar (IPG) Sarawak berengkah bulan November tu.

Pengawa tu dikena ngenegapka agi pengawa ngajar enggau belajar (PdP) dalam sistem Inisiatif Negapka Pelajar Sains, Teknologi, Injinir enggau Matematik (STEM).

Menteri Pelajar, Sains enggau Pansik Teknologi, Datuk Amar Michael Manyin Jawong madahka, kira-kira 600 iku pengajar deka dilatih baru lalu opis menteri iya udah bisi agih belanja matih baru pengajar nya.

“Pengajar tu deka dilatih baru laban tebal agi, sida diasuh ngajar subjek nya taja nya ukai pilih nya ngujungka sida nadai ulih meri perati ngagai bala nembiak lalu kadang enda ulih ngajar pekara ke betul.

“Nya alai, pemutus sida matih baru pengajar tu deka mujur nengah kerejasama ari Palan Pematih Pengajar (IPG) Batu Lintang, IPG Tun Abdul Razak, IPG Kampus Sarawak Miri enggau IPG Rajang.

“Pemutus tu deka meri empas ke manah ba inisiatif STEM setipak enggau visyen Kepala Menteri Datuk Patinggi Abang Johari Tun Openg nyikap nembiak enggau pelajar nitihka peminta Industri Revolusyen 4.0 (IR 4.0),” terang iya.

Manyin mansutka jaku nya lebuh Pengawa Ngelancharka Bup Model STEM 4.0 Renggat Sekondari di IPG Batu Lintang, ditu tadi.