MIRI: Penggerak Komuniti Negara (PKN) Miri udah bepupuka belanja dikena mantu ruang bilik dua iku kru Kapal Dayang Topaz ti bebadi nyawa ketegal kapal nya nyau deka karam, ditu tadi.

Chairperson PKN Miri, Korina Mang madahka sida udah nyuaka tulung mata duit penyampau RM1,400 siku ngagai pengari orang ke sebilik enggau seduai nya.

Ku Korina, iya empu merambu enggau berandau nengah Whatsapp Group PKN Miri pasal pengawa mantu ruang bilik ti ditinggang penusah nya.

“Nya alai, kami sebuat lalu berengkah mupu belanja udah semua kaban komiti setujuka perambu aku tu.

“Nyangka bantu tu mimit tang kami naka ulih mantu sida sebilik ti ditinggang penusah.

“Meri penyinu ati lalu aku ngarapka sida tu sabar enggau liat ati nempuh penguji besai baka tu,” ku Korina.

Nangkanka nya, iya mega madahka bala bukai bisi bepupu baka kaban PKN Sarawak, artis Iban iya nya Emma Anthony, bala bukai ari Miri, Bintulu enggau Kuching.

Nambahka nya, pengempu anak serikat Bubu Ridan Enterprise, Miri enggau pengempu Sailor’s Cafe, Sibu sereta Serikat Slymax HCS SDN BHD, Miri mega bela besaup nyuaka pemeri nengah NGO PKN Miri ngagai ruang bilik tu.

Ku Korina, duit tulung nya udah disuaka pengari iya, Irlene Bungan Yahya ti mega Sekretari PKN Miri ngagai pengari Manpower Superintendent, Ang Chung Khiong.

Sama nyempulang Irlene iya nya Judy Sharon Thou Yene Yuet ti nyadi Raban Indu Biak PKN Miri sereta Kaban Komiti PKN Miri ke bukai.