KUCHING: Sebarang bantu deka diberi ngagai peranak genturung pendiau Haji Baki semina nengah raban gawa ba luan aja laban genturung nya ditutup penuh dikena mutuska rantai pengerekai igi penyakit Covid-19, ku Datuk Seri Fatimah Abdullah.

Menteri Pengintu Pengelantang Raban Bansa, Orang Indu, Ruang Bilik enggau Pemansang Anak Mit (KWKPK) nya madahka, orang diau di genturung pendiau nya enda ulih pansut sereta orang luar mega enda ulih tama kia.

“Ari sukut bantu, baka pemakai deka diberi ngagai sida dia laban semina genturung nya aja di Sarawak bejalaika Atur Tagang Pejalai Diterit (PKPD).

“Bantu pemakai nya deka disua nengah raban gawa ba luan lalu sida deka nyadung ngagai orang ke diau dia,” ku iya.

Fatimah bejaku munyi nya lebuh di tanya raban pemberita udah tembu Randau Kaban Kaunsil Pemansang Rama Sarawak (MPS) ba Bilik Mesyuarat Melur KWKPK, Begunan Baitulmakmur II, ditu tadi.