KUCHING: Komiti Penyanga Penusah Ngenyit Negeri (JPBN) sehari tu ngaga pemutus nutup palan tuisyen, tadika enggau taska di Pelilih Kuching berengkah ari 30 Oktober nyentuk ke 13 November tu.

Chairman iya, Datuk Amar Douglas Uggah Embas madahka pemutus tu digaga udah Pelilih Kuching ditetapka zon mirah.

“Pia mega institusyen pelajar ke bisi ditu bela ditutup ba timpuh ke sama.

“Tu ngaul 209 institusyen pelajar selampur Pelilih Kuching ti mungkur sekula primari enggau sekondari dipegai KPM, Palan Pematih Pengajar, Kolej Matrikulasyen sereta sekula peribit regista enggau KPM,” ku iya ba aum media pandemik Covid-19 ditu tadi.

Uggah mega minta rayat sedar enggau beratika penyampau kes positif ti majak nambah.

“Semua rayat Sarawak mesti bejalaika pangku pengawa diri empu nentuka Covid-19 ulih ditagang ari majak ngerekai.

“Taja pia, sekeda ari kitai agi tebelengga lalu enda ngasika Standard Atur Pengawa (SOP) ti udah ditetapka,” terang iya.

Uggah nyemetak madahka raban penerit adat udah dipinta bejalaika atur terit agi ngagai sida ti ngelanggar SOP.

“Semua tu dipejalaika ungkup pemaik rayat enggau rantai Covid-19 jampat rintas ngambi kitai ulih ngereja pengawa baka selama.

“Pelilih Kuching diatu udah status mirah lalu mensia mayuh dilalau anang mindah enti nadai kebuah ngambi kes badu nambah,” ku iya.