LIMBANG: Komiti Nembiak PBB Pampang N79 Bukit Kota besemaya deka terus betunggang sukung ngagai Perintah Gempung Parti Sarawak ba pengawa bepilih nengeri deka datai.

Ketuai Nembiak PBB Pampang N79 Suffian Mohat madah, tulung ke udah diberi ‘Yang Berhormat’ (YB) ungkup sitak Limbang sepanjai iya udah gawa endang chukup berupai.

Ku iya pemansang ke dipeda ari sukut fizikal enggau mega ari pemansang nyengkaum bantu ngagai komuniti besemak endang asil ari pengeransing sida lalu nya kebuah kitai patut meri sukung penuh ngagai perintah.

“Pemansang ke meruan ngagai semua komuniti sempama siti berekat ungkup kitai Limbang.

“Aku besemaya begulai enggau bala nembiak PBB Bukit Kota, kami deka nentuka sitak Bukit Kota terus nyadi kubu tegap GPS,” ku iya rambau Program Pejalai Armada Nembiak PBB Sarawak, ba balai raya Kampung Patiambun, malam kemari.

Suffian ke mega Ketuai Opis Kaunsil Pelilih Limbang madah, mayuh program udah dipejalai komiti Nembiak dikena besemak enggau mensia mayuh.

Kenu ku iya, program tu digaga begulai enggau komiti orang besai tuai enggau indu kekadang bejalai kediri.

“Udah mayuh program dipejalai, ninting bulan enggau ninting minggu. Aktiviti ukai semina numpu ngagai pengawa komuniti yang mega ari sukut ekonomi enggau pengelantang pendiau,” ku iya.