DUNGING anak Gunggu tu chukup tampak rita enggau digelar Raja Tengkebang berindik ari pemintar enggau pengeransing iya ngiga penemu ba mayuh pekara lebih agi pasal budaya raban bansa Iban.

Serak tu, kitai deka bekunsika penerang pasal Dunging anak Gunggu ti ditusui Prof Madya Dr Bromeley Philip, uchu bilik sepiak iya.

Dunging ada dalam taun 1904 ba Rumah Panjai Nanga Ulai, Rimbas Ulu, Debak, Saribas, Betong nyentuk ke iya sulai kena 20 June 1985.

Kedua bali nama Dunging iya nya Seragunting tang nama tu jarang disebut enggau ditemu orang.

Indai iya menya suah ngangauka iya Gunting. Dunging tu anak kelima ari tujuh iku diri menyadi.

PINTAR RUNDING…. Aki Dunging digelar Raja Tengkebang Iban laban ngembuan runding ti pintar enggau nengkebang Urup Iban.

Ripih sida menyadi tujuh iku baka tu; Munan, Enduyan, Engkasan, Mawan (aki ngadaka indai Dr Bromeley), Dunging, Mapan enggau Chandu.

“Aki Dunging nadai kala besekula chara formal laban rambau sida kelia jarang endar kitai Iban ulih besekula ketegal jauh ba menua ulu.

“Taja pia, Aki Dunging tu lanchar macha sereta nulis dalam Jaku Iban lebuh maya iya nyau besai tuai.

“Iya mega nemu ngira sereta nemu nulis ngena Tulis Jawi lalu penemu baka tu diulih iya belajar ari sebarang orang ti deka ngajar iya,” terang Dr Bromeley.

Nambahka nya ku Dr Bromeley, Aki Dunging tu puh amat belajar beratika gaya utai lalu iya ngembuan runding neladan enggi orang nyamai. Enda asai kitai ti nengkebangn kediri empu.

PURIH PANTIS… Anak menyadi Dr Bromeley begambar ba tiang ke bisi ditulis Aki Dunging kelia.

“Nya meh penemu dikemeran Aki Dunging dataika iya nemu nulis enggau macha,” ku iya nerang silik.

Berindik ari ngembuan ati tajam enggau penemu deka nengkebang utai, Aki Dunging tu meh Iban keterubah nengkebang urup kediri empu.

Penemu tu endang nyelai ari orang bukai lalu iya endang engkeman digelar Raja Tengkebang Iban.

Nangkanka nya, Dunging mega bisi nengkebang bemacham kereban bukai kelimpah ari urup tulis.

“Ulah Aki Dunging bebida amat ari bala Iban bukai. Kilap sereta perening mata iya tajam gerenyam lalu pejalai iya regas.

NAMPUNG BILIK DUNGING… Anak menyadi Dr Bromeley begambar ungkup kenang enggau Bagat sereta bini iya.

“Jaku dipansutka iya bisi nyemetak didinga lalu chara iya ngereja pengawa pen berani, enda mudah ngechul mantul.

“Iya enda sanggu ngereja pengawa ti udah dikemeranka ati iya lalu nadai ngira enti pengawa nya enda ngenataika asil taja pen iya pengawa iya dibantah tauka dipuji.

“Semua pengawa dikembuan tauka dikeinginka dalam ati endang terus dikereja sepemuas ati iya empu,” ku iya nerang.

RINDU MANSIK

Dr Bromeley mega madahka Aki Dunging tu rindu mansik penemu enggau beratika budaya raban bansa Iban.

Terang iya, Aki Dunging tu chukup rindu mansik gaya pendiau, runding enggau ulah raban bansa Iban.

Budaya Iban lalu dibanding Aki Dunging enggau raban bansa bukai.

PENGIDUP RUMAH PANJAI… Anak menyadi Dr Bromeley begambar ba ruai rumah panjai Nanga Ulai.

Kelimpah ari nya, Dr Bromeley mega madahka Aki Dunging tu rindu beratika kebuah pendiau enggau pengidup raban bansa Iban mengkang jauh tinggal ari raban bansa bukai.

Beduduk ari pekara tu, dia Aki Dunging suah mindah bejalai kulu-kili sambil berandau besilih penemu enggau sebarang orang ti rindu berandau enggau iya.

Penemu diulihka iya ari pengawa beratika pendiau bala mayuh udah dikenataika nengah pantun dikarang iya empu.

ku Dr Bromeley, pantun Aki Dunging tu mudah dibacha sereta reti ti deka dipadahka iya ngena chara bepantun mega terang bendar.

“Aki Dunging bisi ngarang kira-kira 100 iti pantu dalam Urup Iban tang sayau amat laban semina kira-kira 30 iti pantun aja ulih diraup Bagang anak Nunui, anak iru ti nampung bilik iya nyentuk ke diatu,” ku Dr Bromeley nyimpul randau enggau pemberita Suara Sarawak.