KUCHING: Entara peminta ti pemadu mayuh ari raban nembiak lebuh ngulu Program Pejalai Nembiak Sarawak 2020 di menua pesisir iya nya servis arus penyambung digital.

Menteri Nembiak enggau Lumba Datuk Abdul Karim Rahman Hamzah madahka raban nembiak di menua pesisir napi penanggul ngulihka arus penyambung digital lebuh deka nganjung video enggau pekara bukai ti bekaul.

“Tu endang topik ti pemadu rindu dikerandau bala nembiak di menua pesisir baka di Kapit enggau Limbang.

“Nyauka semua palan ti dilawa raban nembiak minta arus penyambung digital digaga enggau lengkas,” ku iya.

Karim bejaku munyi nya ba aum pemberita udah bejadika Randau Begulai enggau Raban Nembiak beserimbai enggau Program Pejalai Nembiak Sarawak 2020 Dun Tupong di sebuah hotel ditu, tadi.

Ku iya, peminta nya entara pekara ti endang deka dipejurai dalam Bajet Nengeri ti deka datai.

“Aku enda bangat irau pasal agih belanja ngagai pekara digital laban Kepala Menteri (Datuk Patinggi Abang Johari Tun Openg) endang bisi meri belanja ungkup nya.

“Kitai benasip manah laban Kepala Menteri endang ngemeratka pekara digital ngagai menua, endang bajet ti deka datai bisi ungkup ngagai pekara digital,” ku iya.

Kelimpah ari nya, lebuh ditanya pasal raban nembiak ti mayuh nadai gawa ketegal pengerekai Covid-19, Karim madahka penanggul tu ukai semina ditapi raban nembiak aja tang mungkur semua orang.

“Aku ngarapka raban nembiak besabar enggau ngiga pengelebih diri empu dalam ngiga pengawa bukai.

“Anang enda landik begigaka pengawa bukai sereta meda peluang endur ngulihka penatai pemisi baka bejalaika servis nganjung pemakai nengah ‘foodpanda’.

“Tu entara peluang kereja baru ti manah ketegal orang mayuh enggai makai di luar tang meli barang pemakai nengah chara online,” ku iya.

Ngelansa pasal perambu ti minta Wang Turu Pengereja Pengawa (KWSP) dikeluarka RM10,000 iya madahka diri bedau nemu silik pasal perambu nya.

“Aku bedau nemu enggau silik perambu nya, tang nyema perambu tu amai nyadi aku ngerunding Perintah Besai endang naka ulih ngaga pemutus ti manah ungkup rayat.

“Taja pia, kitai mesti ingat duit ti disimpan dalam KWSP nya ungkup penabat udah tuai ila, enggaika kitai nadai duit maya pinchin, pekara tu mesti diperati,” ku iya.