SOP ungkup PRN mesti dipansik nyeliah penyadi baka di Sabah

KUCHING: Sarawak mesti ngaga pemutus ungkup Pengawa Bepilih Nengeri (PRN) Ke-12 ke deka datai.

Presiden Parti Rayat Sarawak, Tan Sri Dr James Jemut Masing madah, PRN mesti dipejalai tang titihka atur nagang pengerekai Covid-19 dikena nyeliahka pengerekai penyakit baka ke nyadi ketegal PRN Sabah apin lama ke udah.

Ku iya, PRN Sabah nya penusah besai laban enda ulih nagang pengerekai Covid-19 pengudah kes majak nambah ba Sabah enggau nengeri bukai ba Semenanjung Malaysia.

Ku Masing, Covid-19 ukai semina ulih berampit tang mega tau munuh enggau meri penanggul ngagai perintah.

“Ba bulan April 2021 tu, Dun kitai udah datai ba timpuh lima taun. Reti nya kitai mesti ngatur PRN12 ba bulan April 2021.

“Pakar perubat madahka igi penyakit Covid-19 tu agi ngerekai enggau ngeruga pengerai abis nadai setaun agi.

“Nya kebuah kitai mesti nginsur 60 hari agi madamka Dun tang timpuh nya pandak aja enggau nadai ulih nentuka kitai ulih ngelepaska diri ari igi penyakit Covid-19, diatu nama pekara ke patut dikereja kitai?,” ku Masing.

Masing ti mega Sapit Kepala Menteri mansutka jaku nya lebuh Pengerami Makai Taun Ke-16 PRS enggau Makai Selamat ba Palan Aum Borneo Kuching (BCCK), Hari Tiga tu tadi.

Ku iya, enti sema PRN ditangguh nyentuk bulan June 2021, ekonomi menua kitai deka kusut lalu enti PRN dipejalai enda lama agi, menua kitai napi penusah ketegal pengerekai Covid-19.

Taja pia, iya pechayaka PRN ulih dipejalai baka Singapore, Korea Selatan enggau New Zealand mujur bejalaika pengawa bepilih besai enggau nadai penanggul.

Masing mega madah, kitai mesti mansik enggau silik sentang Atur Pengawa Standard (SOP) ke diguna Perintah Korea Selatan, Singapore enggau New Zealand enti sema dekaka PRN12 dipejalai taun tu.

“Peranak ba rumah panjai, genturung pendiau enggau palan pengentap bukai mesti nagang orang luar tama tauka pansut ari nya.

“Gempuru besai mega ditagang! Pemesai SPR mesti nitihka SOP pengerai ti udah diterit maya gawa nentuka hari ngundi lanchar dipejalai.

“Sebarang pemutus ari Perintah GPS, kitai mesti belajar pasal pemujur Singapore enggau Korea Selatan lebuh beratika penusah ti nyadi lebuh PRN Sabah ba bulan September tu tadi,” ku Masing nyemetak madah.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak