KUCHING: Bajet Sarawak 2021 ti dibantaika Kepala Menteri bukti pengeransing Perintah Sarawak dalam ngerembaika ekonomi menua.

Sapit Kepala Menteri Datuk Amar Douglas Uggah Embas madahka, penyampau agih belanja ti diberi taun tu mega bisi niki RM326 juta tauka 40.9 peratus enti dibanding enggau taun siti nyin kemari.

“Aku mega deka beterima kasih ngagai Kepala Menteri laban udah ngagihka penyampau RM1.123 billion dipelabaka ba 2021 ungkup negapka transformasyen sektor betanam betupi di menua tu.

“Enggau ati gaga, aku deka madahka sektor betanam betupi tu deka terus besemekih enggau deka nyadi penatai pemisi pemadu beguna ngagai Keluaran Dalam Negara Kasar (KDNK),” ku iya.

Iya bejaku munyi nya, lebuh nyimpul jurai Aum Kedua Renggat Kelima Dun ditu, ensana.

Ku iya, ba taun 2019 sektor betanam betupi udah meri penatai pemisi penyampau 12.1 peratus tauka RM16.5 billion ngagai KDNK negeri enggau ngerikodka Lebihan Imbangan Dagang Betanam Betupi Negeri penyampau RM6.9 billion.

Nangkan nya, ari sukut Imbang Dagang Pemakai, Sarawak bisi ngerikodka defisit penyampau RM3.98 billion ba taun 2019.

Iya mega madahka, opis menteri iya deka terus komited ngeranchakka sektor betanam betupi di menua tu nengah mayuh bengkah program ti udah ditetapka.

Program tu nyengkaum meri fokus pemansang sekeda bidang dalam sektor nya baka industri padi enggau nupi jelu ti ngempu peluang besai nambahka ekonomi menua.

“Raban orang bumai ti bekaul deka dibantaika ngagai sekeda chara ti jampat dalam aktiviti betanam betupi kelimpah nerima agih belanja mantu sida dalam pengawa betanam betupi,” ku iya.