SIBU: Raban orang gawa perintah ditu berasai gaga ati sereta meri terima kasih besai ngagai Perintah Nengeri Sarawak laban udah ngungkupka bantu belanja tauka bonus, ke kelai meri basa ngagai pemanah budi enggau penyakah raban sida ngereja pengawa.

Ignatius Golen, 27, siku ari raban Opis Pemadah Malaysia (JPM) Pelilih Menua Meradong madahka pemeri bonus tu meri pemaik sereta besai reti ungkup raban pekereja perintah, tebal agi sida ke dipegai ari baruh Opis Perintah Besai ba nengeri Sarawak.

“Berasai gaga ati sereta meri terima kasih besai ngagai Kepala Menteri kitai. Bonus tu besai reti ungkup semua pekereja perintah ba nengeri tu.

“Tu ngayanka perintah nengeri tu seruran meri basa, tanda terima kasih sereta ngenang pengawa ti udah dipejalaika bala pengereja perintah ungkup nengeri sarawak,” ku iya lebuh dirandau Suara Sarawak kemari.

Berebak enggau nya, ungkup Desmond Merinding, 39, ke mega siku Penulung Pemesai Opis Betanam Betupi Bagi Menua Song madah, tu ke tanda Perintah Sarawak chukup ngemeratka senentang pekara belanja rayat, kelebih agi ba timpuh napi pandemik Covid-19 tu.

IGNATIUS GOLEN

“Terima kasih ngagai Kepala Menteri enggau Perintah Nengeri Sarawak ti chukup siru sereta ngemeratka senentang pekara belanja rayat, tebal agi orang ke gawa perintah enda ngira ari baruh pegai Opis Perintah Nengeri tauka Perintah Besai.

“Bantu tauka bonus sebulan setengah gaji tu besai guna sereta engkeman ungkup kitai napi pandemik Covid-19.

“Kebuah pia, maya tu mar alai kitai begiga tauka nambah penatai pemisi ke bukai, ungkupka belanja diri sebilik,” ku iya.

Nangkanka nya, ku Thomas Billy Andom, 31, bantu belanja tu ulih ngelempungka mimit senentang tating belanja diri empu.

“Berasai lempung mimit, bisi kena nambahka belanja diri nyentuk ujung taun tu. Kelimpah ari nya, tu mih ke tanda perintah nengeri meri terima kasih ngagai semua orang ti gawa perintah, kena napi pandemik Covid-19,” ku iya.

DESMOND MERINDING

Sebedau tu, Kepala Menteri Sarawak Datuk Patinggi Abang Johari Tun Openg ba siti penerang kilah ensana madahka orang ti gawa perintah ba nengeri tu deka nerima bonus sebulan setengah gaji , ambis kurang RM2,000 .

Tu ku iya nyengkaum sepenyampau RM500 ungkup sida ti gawa perintah ari baruh Opis Perintah Besai.

Ku Abang Johari nambah, Perintah Gabungan Parti Sarawak (GPS) endang ngenang pemanah enggau komitmen raban pekereja Perintah Nengeri enggau Perintah Besai dalam bejalaika tanggungpengawa sida enggau chara profesional, semanjai timpuh ti mar tu.

“Lebuh pandemik Covid-19, raban pekereja Perintah Besai enggau Nengeri nyengkaum lutur, misi, pekereja opis pengerai, raban uniform enggau semua raban ba baris luan ti udah gawa enda ngira pengelelak diri kena nyaga pengelikun rayat,” ku iya.

THOMAS BILLY ANDOM