KUCHING: Anang jampat nyimpul jaku, ku tangkan Kaban Parlimen Bintulu Datuk Seri Tiong King Sing.

Iya bejaku munyi nya nimbal penerang Menteri Dagang Temuai, Seni enggau Main Asal, Datuk Abdul Karim Rahman Hamzah ti madahka penerang iya pasal “DG takut mati” ngasuh tekenyit sereta ngemalu.

Kenu ku iya, , Abdul karim patut meresa penerang penuh ke dibantai iya lalu anang semina bemalinka ripot berita ke dikemesai siti piak.

“Lalu nyema iya (Abdul Karim) amat ngasaika semua kaban Gempung Parti Sarawak (GPS) baka diri sebilik, nyadi manah agi betelefon ngagai aku awak nemu pasal penanggul tu sebedau meri komen,” ku iya pasal penerang, 13 November tu tadi.

Berebak enggau nya, King Sing mega meri terima kasih ngagai Sapit Kepala Menteri Tan Sri James Jemut Masing laban tangkan iya sentang ngena jaku ti enda engkeman lalu nyukung penemu minta Direktor Besai Opis Pengerai empu patut nemu pasal penanggul ba renggat baruh.

“Aku deka madah sekali agi aku endang nadai niat deka ngemedis ati bala staf ‘terabai menua’. Kebendar, aku mega berati pengawa sida nadai ngira lelak ngelaban Covid-19.

“Isu-isu tu mesti diputar enggau manah agi, ungkup pengerai rayat Malaysia dudi hari. Nadai kebuah deka mai isu pengarap, bansa ngagai pekara tu,” ku iya.

Nya alai, aku ngarap Direktor Besai Opis Pengerai Tan Sri Dr Noor Hisham Abdullah seruran datai nyenguk rayat lalu meretika baka ni chara pemadu manah ngelaban penyakit ti majak ngirauka ati tu.

“Tan Sri (Dr Noor Hisham), nuan udah ngering diri lalu madah diri amat udah nurun ke Sabah kena bulan Ogos.

“Kebendar, kes Covid-19 di Sabah chukup mimit maya nya lalu nama kebuah nuan bisi din maya nya tang nadai agi din lebuh kes tu nyau majak balat.

“Enti nitih bisi atur khas kelimpah chara nagang baka selama digaga dikena nyekat pengerekai kes tu,” ku iya.

Berebak enggau nya, King Sing mega madah iya enggai ngemanjaika penanggul nya lalu ngarap semua piak enda ngira bida peneu politik bela besaup ngelaban penyakit tu nyengkaum ngangkatka baru ekonomi.