Raymond Ho, 32 tauka lebih dikelala enggau nama Reaza Ray Ho udah sedia nerima sebarang pejah tauka komen positif ari peminat mayuh dikena ngemanah agi pengawa iya ti baru masuk dalam dunya pemerindang.

Penemu ari mensia mayuh chukup beguna awak ulih nyadika sanding penemu diri terus nyapai pemujur ba industri muzik Iban, ku iya.

“Kebuah pia, komen orang ulih ngembing kitai nyadi manah agi dalam sesebuah pengawa nya, tang bejimat, kitai mesti rasional sereta lansik manding bida komen ti ngidup tauka ngelabuhka nuan.

“Komen ti enda manah tau teju ke tisi aja mih, jaga ‘discipline & attittude’ diri empu.

“Besemekih manah enggau orang bukai nitihka utai ti dikerinduka bala peninga, seriris enggau pemansang dunya lalu ngaduka bemacham ‘genre’ muzik.

Reaza Ray Ho

“Enggi aku, aku deka ngemeranka identiti diri empu lalu orang ninga sada nyawa tauka muzik nya, sida nemu nya Reaza Ray Ho,” ku iya.

Nangkan nya, ku iya kebendar lagu ‘Anang Touching-Touching’, siti lagu ranchak ngena genre dangdut diatu benung angat dimainka bala dj radio enggau ba media rama lebih agi ba churung radio jaku Iban di Sarawak.

PENAKAN CHINA-PHILIPINE-IBAN

Siku penanyi Iban ti ngembuan sada nyawa ti chukup manah sereta majak dikelala peminat tu madahka penatai asal diri ari Kuching, Sarawak sereta anak penakan bansa China, Philipine (Apai) enggau Iban (indai).

“Aku berengkah enggau pengawa belagu tu kenyau ari umur 14 taun, kena taun 2002 lebuh dianjung apai aku enggau pekit belagu, lalu nya mih nyadi peransang aku neruska pengawa belagu nyentuk sehari tu.

“Batang pengawa aku iya nya nyadi Operasyen Menijar ba sebuah hotel di Kuching, tang ketegal pandemik Covid-19, aku diatu kemisi lalu bisi bejalaika pengawa dagang mit seraya ti nganti pulai gawa baka selama,” ku iya lebuh dipinta pengarang berita nerangka pasal diri empu, empai lama.

Berebak enggau tu, ku Reaza, leka enggau tiun lagu Anang Touching-Touching ditengkebang iya empu lalu muzik diaduka Cami Tan ari Ranyai Studio.

“Lagu tu ditengkebang aku dalam bulan Februari 2020, dirikod dalam bulan March sereta dipansut ke 6 April ba stesyen radio Catsfm.

“Taja pia, ketegal PKP (Atur Mindah Betagang) suba lagu tu bisi penanggul mimit lau laun tama ba RTM (Waifm), lalu dipansutka ari baruh label kompeni Kaban Music Production (KMP),” ku iya.

Nyerita silik pasal lagu tu, ku Reaza, lagu Anang Touching-Touching diambi ari leka jaku nembiak kemaya hari tu ti mai reti anang ensiban tauka tusah ati.

“Kebendar iya cherita lagu lagu tu ditengkebang aku lebuh ba palan alai gawa lalu tekenangka kaban lama aku ti lama enda ditemu berita.

“Pengudah aku nemu kebuah iya ngiyarka diri ari aku, ati aku nyau berasai ‘touching’ (ensiban).

“Nya alai aku nengkebang lagu tu kena meransang ati diri empu enggau meri jaku lalau ngagai semua orang, ngambi enda kiruhka jaku orang bukai ti kepapaska pengidup kitai.

“Tetiap pengawa ti dikereja kitai, sekalika manah tauka jai, sigi bisi timbal ba dudi hari ila,” ku iya nyemetak.

Reaza Ray Ho

TIMBAL ARI PEMINAT

Senentang gaya baka ni sambut mensia mayuh ngagai lagu tu, ku Reaza, chukup manah sereta diatu nyadi buah mulut orang kelebih agi ba media rama.

“Sambut ti chukup manah, tau dipadah diatu nyau deka ninting hari stesyen radio Waifm masang lagu tu.

“Official MTV lagu tu mega baru udah dipansutka ba channel ‘Youtube’ KMP enggau penyampau urung 20 ribu orang ti meda (viewers) video lagu nya, pengudah seminggu dipansutka.

“Mayuh mega orang mantaika status ba media rama sida sereta tag aku enggau leka sereta lagu “Anang Touching-Touching” tu,” ku iya baru.

Ke penemu rama, lagu single keterubah ari Reaza iya nya ‘Tanda Tanya’, kedua Anang Touching-Touching lalu lagu ketiga sereta pemadu baru iya nya ‘Sulu Ku’.

“Enti nadai penanggul, lagu Sulu Ku deka bisi ba stesyen radio Waifm enda lama agi.

“Diatu aku benung ngumpul utai ke patut ungkup lagu single ke4 sereta belajarka gaya muzik industri kitai di Sarawak, nitihka utai ti dikerindu enggau gaya kemaya hari,” ku iya.

Tetiap bengkah pengawa ti manah sereta dikereja kitai mensia endang begunaka sukung ari orang bukai, baka nya mega enggi Reaza dalam pengawa belagu tu.

SUKUNG ARI DIRI SEBILIK

“Enti nadai sukung ari orang bukai, sigi enggai nyadi mih pengawa aku dalam industri muzik tu.

“Tebal agi apai indai, menyadi, kaban belayan ti sama enggau gawa sereta ke semak, sida mih orang ti meruan meri embing ngagai aku.

“Nambahka nya, Lee Ramos ti deka melanja kami ngaduka siti album kompilasi tu ila lalu orang ti mayuh ngajar aku dalam industri tu iya nya Isa Lee enggau Sakura Diana Dawi,” ku iya nambah.

Beduduk ari nya, Reaza ngarapka diri diterima sereta bulih sukung ti tegap ari mensia mayuh ngambika iya mengkang mantaika pengelandik diri enggau mujur nyadi pemerindang dalam industri muzik Iban tu.

“Semua kitai mesti dekaka pemujur dalam tetiap pengawa ti dikereja kitai, aku enda ngarapka utai ti ngeninggi remang.

“Mayuh orang nemu penau tauka ngelala sapa Reaza Ray Ho dalam industri muzik Iban tu. Nya alai, aku deka terus merindang laban beratika timbal ari bala peminat chukup manah diumba enggau sukung ari apai enggau indai aku empu.

“Kelebih agi indai aku suba kala nguji deka ngerikod lagu tang puntan, nya alai juluk nya diatu udah nyadi nyata nengah tubuh aku empu.

“Nadai leka jaku ke bukai ti ulih dipadah aku, terima kasih memayuh, arapka semua kita bulih berekat ari petara.

“Tau nitihka berita pejalai pemerindang aku ba ‘Facebook’ iya nya ‘Reaza Ray Fans Followers’,” ku Reaza madah.

Ungkupka penemu, lagu Tanda Tanya udah kala bulih lumur satu pengelama 11 minggu ba Carta Lagu Tebilang Catsfm.

Diatu lagu nya mega udah mujur tama Carta Sapa Juara (CSJ) Waifm 2020 sereta mensia mayuh ulih berengkah ngundi ba akaun Facebook CSJ.

LAGU ‘ANANG TOUCHING-TOUCHING’
Penanyi : Reaza Ray Ho
Komposer: Reaza Ray Ho
Leka Lagu : Reaza Ray Ho
Music Arranger & Guitar Works: Cami Tan
Produser: Reaza Ray Ho
Publisher: Kaban Music Production (KMP) Sdn. Bhd.

Dinga
Dinga mih sebana
Lagu aku
Dinga mih lagu aku

Pengidup di dunia
Sigi mayuh penguji
Enda ulih ditagang
Sigi tetap nyadi

Bisi maya nyamai
Bisi maya pedih
Tang nya mih pekara
Meri kita pengering

Mulut enggau jaku mensia
Enda alah kira you you
Bisi orang ka rindu
Mayuh mega ka chemburu

Anang ninga ka jaku orang
Jaku jai munuh nuan
Ukai nundi jaku beduan
Enti Petara ka malas iya

Ohh wai kita
Anang touching touching
Anang touching touching

Bisi maya kitai diatas
Bisi maya labuh tebabas
Pekara jai buai ke tisi
Anang kiruh anang mih nangi

Ambi jaku beri pemansang
Jaku jai buai ke belakang
Orang bejai anang ngelaban
Anang nyambung cherita orang

Sempama jaku orang ribai
“KARMA” tetap ngagai nuan
Everything you do will
Come backs to you