KUCHING: Perintah Sarawak udah ngena belanja RM96 juta dikena mutarka pandemik Covid-19 kenyau March nyentuk Oktober tu tadi.

Sapit Kepala Menteri Datuk Amar Douglas Uggah Embas ngaku pengerekai pandemik nya entara pemar pemadu besai ngagai Sarawak.

Ku anggap iya, pengawa dalam napi krisis penyakit tu deka nentuka pendiau Sarawak dudi hari.

“Pemutus ti digaga kitai diatu nentuka sapa kitai ngagai orang enggau penemu nama ti deka dikemisi kitai dudi hari.

“Napi pemar, patut kini kitai ngeransi, takut enggau tusah ati?Tauka patut kini kitai taluk ngagai diri empu, bediri teguh, ngaga pemutus ti mar enggau terus pechaya sereta bepanggai ngagai orang?,” ku tanya iya lebuh bejaku nyimpul jurai maya Aum Kedua Renggat Kelima Dun ditu, ensana.

Uggah ti mega Chairman Komiti Penyangga Penusah Ngenyit Negeri (JPBN) Sarawak madahka Kepala Menteri Datuk Patinggi Abang Johari Tun Openg besemaya deka ngagihka penyampau belanja ngambika semua rayat Sarawak tau nerima vaksin pengudah vaksin nya disediaka ungkup nengeri tu.

Iya nyemetak madahka JPBN deka nentuka pengerekai pandemik nya ulih dipunas awakka pengelantang rayat neruska pengidup meruan agi.

Iya mega nandu JPBN deka terus gawa nyaga pengelikun pengerai enggau sistem pengerai mensia mayuh dijamin nangkup peminta rayat enggau terus ngelindung sida ti muntang dirampit Covid-19.

“Tuju nya endang dikena nentuka tiap pelilih menua di Sarawak ba status gadung enggau nadai Covid-19,” ku iya.