KUCHING: Opis Bomba enggau Penyah Penusah Malaysia (JBPM) Sarawak begulai enggau Komiti Penyangga Penusah Ngenyit Nengeri (JPBN) Sarawak chakah nyikap diri kelebih agi ba pengawa napi penusah bah ba nengeri tu.

Direktor JBPM Sarawak Khiruddin Drahman madahka, JBPM seruran nyikap diri ba operasyen nyelamat sereta nusun atur pengawa mindahka sida ti dituntung penusah nya enti sema diguna.

“JPBN mega udah mansutka prosedur atur pengawa (SOP) ba genap palan ngentap enda lama (PPS) ba nengeri tu.

“Genap pelilih ba menua tu udah digerah ngambi bejalaika pengawa matau ba genturung ti seruran dituntung bah lalu ngatur pejalai aset nitihka pelilih,” ku iya lebuh dirandau Suara Sarawak, kemari.

Nangkanka nya ku iya, latih ngagai raban bomba ba pengawa nyikap diri udah dipejalai lebuh bah nyadi ba bagi menua Kapit kenaka 13-16 September tu tadi lalu sida ba endur nya udah meri kerejasama ti chukup manah.

Ku iya, mayuh macham pengawa dipejalaika JBPM nyikap diri lebuh musin bah nyadi nyengkaum beratika kereban nyelamat baka tali, bot enggau Personel Floating Device (PFD) seruran manah sereta ulih dikena.

Kelimpah ari nya ku iya, JBPN mega udah netapka semina 20 peratus kemisi ngagai bala pemesai enggau raban JBPM ke alai penyampau sida tu di selampur Sarawak bisi 1,192 iku enggau 230 iku pemesai bomba volunter.

“Kelimpah ari bejalaika pengawa matau berenggat ba endur ti suah dituntung bah ba nengeri tu, pengawa matau ari media rama baka Facebook, Twitter, Instagram enggau aplikasyen ke bukai mega bela dipelajaika kami,” ku iya nerang.

Khiruddin nambah, sida mega ngatur penjalai pengawa Raban Bomba Volunter, Bomba Komuniti, Raban Pengesah Komuniti Tasah (CERT) sereta ngatur randau enggau baum begulai enggau ejensi perintah ba renggat pelilih.

Berebak enggau nya, iya mega ngelalau komuniti ti dituntung penusah bah nyengkaum raban pengereja pengawa ba genap PPS ngambika seruran nitihka SOP ti udah ditetapka JBPM, Opis Pengintu Pengelantang Komuniti (JKM) enggau ejensi bekaul.

“Lebuh pengerekai igi penyakit Covid-19 tu, komuniti mega patut seruran nitihka SOP ti dipansutka Opis Menteri Pengerai Malaysia (KKM) nyengkaum ngena sengkabung mua, nyaga pemeresi diri baka masu jari tauka ngena hand-sanitizer, ngemeratka pengawa nyaga takah enggau pangan diri sereta meresa pengerai diri enti sema sakit,” ku iya.

Iya mega madahka JBPM deka mantaika atur pengawa enggau SOP diungkupka ngagai raban bomba ba indu opis JBPM di Jalai Setia Raja kenaka hari dua tu ila.

Khiruddin Drahman